CAPÇALERA: CALANDRETA
CAPÇALERA2: FAI-TE SOCI

Jornalet, gaseta occitana d'informacions

Dijòus, 17 de genièr

Joan-Marc Leclercq

Dimars, 1.1.2019 03h00

Batèsta mediatica a l’entorn deus Gilets Jaunes


Comentaris 5 comentaris    
Dolent Fluix Bo Molt bo Fabulós (6 vòtes)
carregant En cargament


Sentissi un fenomèn estranh que’m pertòca a prepaus deu movement deus Gilets Jaunes. Totas las atacas contra eths me’us hèn paréisher mès anar mès simpatics.
 
Com ac disèvi, a la debuta lo movement m’interessoc pas brica. La reivindicacion suus carburants me pertoquèc pas. Puèi tot a evoluat lèu, las demandas deus manifestants tanben, la volontat d’installar lo Referéndum d’Iniciativa Ciutadana me sembla un progrès deus bons e lo refús de’s balhar un portavotz, una bona causa.
 
La contra-ataca deu poder es mediatica, aquò a pas escapat a degun, e mantuns Gilets Jaunes, au moment de la “hèita VI” de dissabte passat, vengón protestar a París davant las sedenças de las cadenas màgers de television. La tòca principala de lor malícia èra sense de dobte BFM-TV, acusada de la pièger propaganda de cap a lor movement. Espii pas pro aquesta cadena ende’n jutjar la neutralitat.
 
Parlarèi pas deu rapòrt d’Amnesty Internacional sus las violéncias policièras, de la recomendacion deu Dehensor deus Drets (Jacques Toubon) d’enebir lo lançaire de balas qu’a nafrat un hum de personas, deu clam de 26 jornalistas contra la polícia, ni non pas de la daubertura de 48 enquistas de la l’Inspeccion Generala de la Polícia Nacionala sus actes violents practicats sus manifestants, totas aquestas causòtas que los mèdias a còps “desbremban” de relatar.
 
La hèita que’m butèc mès es l’episòdi de la castanha entre los motards de la polícia e manifestants a una crotzada de carrèras au ras deus Aliscamps. Un filmòt, que tot lo monde a vist au mens un còp,  muisha una troperada de Gilets Jaunes qu’atacan uns motoristas, deus quaus l’un d’eths se tròba dens l’obligacion de sortir son pistolet ende hèr recular la horrèra prèsta de’us linchar. Aquò estoc fòrtament comentat peu govèrn que fustiguèc la violéncia deus manifestants.
 
Levat que, un filmòt drin mès long d’unas secondas muisha qu’a la debuta, son dus motards que lançan suu seguici que passa granadas ditas “de desencerclament”, lavetz que’s vei plan que son pas brica encerclats. Aquò cambia complètament lo caire de vista de la sequéncia e aqueste dusau filmòt (realizat dambe una camèra) estoc publicat mès tard que non pas lo purmèr (hèit dambe un telefonet e doncas botat sus la telaranha de tira, segon lo jornalista).
 
Aquò pòt arribar, mes ausiscoi pas nat comunicat de rectificacion o nada desencusa suus mèdias. Uns jorns mès tard, sus France Info, l’anecdòta oficiala demorava tostemps la purmèra e lo govèrn cambièc pas son devís.
 
L’umorista parisenca de France Inter Sophia Aram se trufèc en tot comparar los Gilets Jaunes dambe “endévias cambiadas en Che Gevara deus giratòris”. Una pelejada entre manifestants briacs e una mameta dens lo mètro parisenc vasoc dens 20 minutes una “agression antisemita”, lavetz que l’entrevista mès tardiva de la dauna interessada rectifica la vertat (Entrevista publicada mès tard dens lo medish jornau). Sèm arribats ad un tau nivèu d’isteria que lo quite François Ruffin, deputat La France Insoumise, realizator deu film Merci Patron es suspectat de simpatias de cap a la dreta extrèma. Caleré rason guardar.
 
Totis los mejans son bons end’explicar au hinestron que lo movement es acabat. Los vèrbes son conjugats au passat quan s’agís de díser que “los comerçants son estats tocats peu movement deus Gilets Jaunes”, lavetz qu’una auta manifestacion es dejà pervista.
 
Lo darrèr artifici deu poder ende hèr baishar lo nombre de manifestants cada dissabte se vei com lo nas au miei de la cara: comptabilizar lo monde deus seguicis a mieidia! De saber que lo rendètz-vos a Tolosa èra a duas oras deu vrèspe, e qu’un dissabte i avoc mès de manifestants que non pas a París, aquò balha una idèa deu tractament de l’actualitat uei lo dia, sense d’engana, dens un esperit de neutralitat e d’informacion imparciala.
 
 
 


abonar los amics de Jornalet
 



publicitat
BANER1: IEA-AALO



Comentaris

3 de genièr 05.44h

Sant Silvèstre sul redond de la Socamil...
Fòrça marcas de simpatia, clacsons e presents...
Fuòc de paletas e calor umana entre gents del ròdol
Sòbri ressopet, cap d'alcoolisme ni de bombança...


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

2 de genièr 22.52h

#3 L'istòria s'escriu a costat d'una part de la societat, que se fisa als mèdias.
La visibilitat e la mobilisacion collectiva de la misèria, sens cap ni porta-votz; çò's prigondament anarquista, es un fenomène social inedit.
Quantas insurreccions dins l'istòria de l'umanitat!
Le movement es pas quimicament blos...mas sembla pas recuperabla politicianament.
Rendètz-vos compte sus plaça...


Valora aquest comentari:   votar positiu 2   votar negatiu 1
Respondre comentari replica Comentari inadequat   Formulari d'abús de comentari

2 de genièr 11.27h

#1 E non i soi pas encara anat, com ac disi me sentissi pas encara sòci deu movement, quitament s'èi un drin de simpatia end'eths. Vau véser quin va evoluir la situacion. Se que non un amic i angoc ende'us portar ... de verbena. M'a dit qu'èran pas que "baba-cools", luenh de l'idèa generala, mes cresi que cada vira-l'ase a sa personalitat pròpria.


Valora aquest comentari:   votar positiu 3   votar negatiu 0
Respondre comentari replica Comentari inadequat   Formulari d'abús de comentari

2 de genièr 10.24h


.Dins 700ans," lo laurier tòrnar flurir", disia lo darrier catar cramat en 1322.
Lo temps es vengut. Es temps de laissar darrier nòstre lo monde materialiste emben sas guerras, sa reussida sociala, sas ilusions,
Es temps de laissar darrier nòstra religions monotheistas emben lòrs inquisicions e l'argent amassat sur l'eschina e la credulitat daus pòples.
Aus enteraments, i a pus de curat ni de discors dau maire. La paraula es a la familha.
Las eglisas se boidan, comas las egleisas daus p... Legir la seguida


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

2 de genièr 06.38h

Brave article...
Es le poder politic que fixa le nivèll de violència e le poder mediatic que ne fixa la percepcion subjectiva.
Es una batèsta d'opinion, clar.
Se le Joan Marc es anat al redond de la Socamil de Tornahuèlha?


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions