Bandièra01 1180x150: Comuna de Tolosa

Opinion

Un Monde sens de Beatles

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Films, n’èi vists una palancada e mès qu’aquò. Benlèu tròp. A mon edat, au cap d’un moment, atz l’impression de véser lo medish film, que sabètz lèu com se va acabar. Compti quitament pas los films americans, qu’es lo sol país d’aver una escòla d’escenaristas qu’aprenguen doncas las medishas causas peus medishes professors.
 
Utilizan los medishes utisses ende provocar emocions en çò de l’espectator. Rapòrts pairs/dròlles, bontat de l’eròi, maishantèr deu marrit de servici, dangèr evitat au darrèr moment, etc ...
 
Èi mès anar mès dificultats ende “entrar” dins un film e’m deishar enganar volontàriament peus efèits cinematografics que cau acceptar ende gostar au plaser de l’istòria prepausada. Me hèi vièlh, benlèu ...
 
Mes per aquesta passa, soi cadut sus una òbra de l’originalitat de las granas. S’apèra Yesterday deu realizator britanic Dany Boyle (lo hilh de la Susan?), l’escenàrio es signat Richard Curtis (lo hilh de Tony?). Aquò me pòt ahortir dens mon idèa que lo cinèma britanic es un deus milhors deu monde.
 
L’istòria d’aqueste film es complètament hòla, e pas besonh d’essajar de soscar s’es cresibla o pas: ac es pas brica tot simplament.
 
S’ètz ahuecats deus Beatles, (non pas amators, mes incondicionaus), solide un bèth dia vos ètz demandatz: “Com seré lo monde, los Beatles avossen pas existit?”
 
Es atau que l’escenarista a imaginat aquesta istòria caluca: un joen cantaire pòp de soca paquistanesa, après un accident de bicicleta, se deishuda dens un monde, aparentament lo medish que non pas avant, levat que los Beatles i an pas existit. Los que coneishen pas de memòria a l’encòp “With”, “Rubber soul”, “Sergeant Pepper”, “Let it be”, e lo live a Hamborg pòdon pas comprènguer. Mes endeus autes, lo plaser es gran.
 
Nòste joen cantaire va doncas vénguer coneishut en tot “compausar” pichonetas cançons coma “I saw her standing there”, “Eleanor Rigby” o “The long and winding road”, arren qu’aquò.
 
Lo sòl problèma es que, per la fin, l’intriga de la debuta es drin deishada de costat end’una istòria d’amor fòrça fòrça mès convencionala.
 
Aquò rai, lo film es un plaser vertadièr, especialament endeus incondicionaus deus Quate Gojats dens lo Vent.
 
 


 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Reinat LO VAU
2.

L'idea non es nòva: "Jean-Philippe", de Laurent TUEL. Arriba la meteissa caua au protagonista (Fabrice LUCHINI, que si revelha dins un monde sensa Johnny HALLYDAY (que juèga eu-meme lo ròtle de Jean-Philippe dins lo film). La diferéncia es que tròva Jean-Philippe, qu'es passat à costat de la sieu carriera, e lo fa devenir Johnny.
https://www.youtube.com/watch?v=RnN3tT1Utxs
http://www.allocine.fr/video/player_gen_cmedia=18601970&cfilm=60628.html
http://www.allocine.fr/video/player_gen_cmedia=18603105&cfilm=60628.html
http://www.allocine.fr/video/player_gen_cmedia=18603106&cfilm=60628.html

  • 3
  • 0
Franc Bardòu
1.

Vesi d'aquí lo tablèu : lo mond sense los Trobadors e los poètas andaloses de l'amor, un mond sense cançon d'amor, qué…

  • 5
  • 0

Escriu un comentari sus aqueste article