CAPÇALERA: IEO09-01
CAPÇALERA2: Botiga

Jornalet, gaseta occitana d'informacions

Dijòus, 1 de decembre

Joan-Marc Leclercq

Dimars, 22.1.2013 03h00

Las benalèjas de Catinon e Jacotin aus espòrts olimpics (I)


Comentaris Pas cap de comentari    
Dolent Fluix Bo Molt bo Fabulós (3 vòtes)
carregant En cargament


Entre los Jòcs Olimpics e lo rugbi, l’istòria que sembra meilèu ua galejada de Bormèla e Grassalò, los dus comics tolosencs, que non pas ua epopèia fantastica deus temps modèrnes on “çò de màger qu’ei de participar”. La saussa n’a jamei gahat, benlèu pr’amor lo particularisme culturau hòrt ne s’ei pas jamei acordat dab ua monidializacion drin uniformizanta de l’espòrt. Tot aquò qu’estoc tostemps caotic ed estranh. Estranh entà l’istòria deu rubgi mès tanben estranh entà l’istòria deus Jòcs. E totun, tot qu’avèva començat de plan, pr’amor au creator deus Jòcs modèrnes, au Pèire de Coubertin que l’agradava hèra lo nòste art e quitament qu’arbitrèc, eth medish, en 1892 la purmèra finala deu campionat de França quan lo Racing vençoc l’Estadi Francés sus l’escòre-fluvi (per l’epòca) de 4 a 3. Estoc eth tanben qui dessenhèc lo purmèr pavés, trofèu de la competicion, qui estampèc un cèrt Carles Brennus qui’u balhèc lo son nom. A maugrat deu sosteng deu creator deu Comitat Internacionau Olimpic en 1894, lo rugbi n’estoc pas includit au programa deus purmèrs Jòcs de 1896. Perqué? Mistèri e hitge gras. Istòria caotica, ça digoi …
 
1900: Los Jòcs se debanan a París, e peu purmèr còp, un tornei-exibicion de “football rugbi” qu’ei pervist. Seré plan hòrt lo qui pòt díser s’èra aquò ua disciplina olimpica o pas, pr’amor qu’ua ceremonia de remesa de medalha se n’ei enseguida. Un beròi fosc artistic, mès aquò rai, n’i aurà d’autes. Tres esquipas be son presentas: França, Reiaume Unit ed Alemanha. Pr’amor de la situacion intenacionau premuda, los alemands (camisòt arrajat roi e néguer) qu’arriban devath la proteccion de la polícia sus la pelosa de l’ipodròme de Vincennes lo 14 d’octobre. França que venç los visitaires 27 - 17. Puish vaquí que s’anóncia l’encontre contra lo Reiaume Unit. Aperar aquesta esquipa “Reiaume Unit” qu’ei meilèu ua vista de l’esperit, pr’amor que n’èra pas formada sonque de sòcis deu club deu Moseley RFC  e la quita premsa anglesa ne mencionèc pas jamei lo tèrmi d’esquipa deu Reiaume Unit. L’arribada britanica que’s hè dens un scenari deus rocambolescs. Qu’avèvan jogat la velha a Birmingham e viatjat tota la nueit (carri, trin, batèu, trin, carri) en tot uns 675 km. Podètz imaginar l’estat de frescor deus jogaire totis estremoluts e croishits peu viatge nuietiu. Qu’arriban a la gara a 6h e l’encontre se debana a 9h deu matin dabant uas 6000 personas, l’afluéncia mei hòrta deus jòcs!! Los francés que ganhan peu dusau còp, mès fàcia a britanics aflaquits sus l’escòre de 27 a 8. Normaument, quan tot se debana dens las règlas, un tornei de tres esquipas “totas redondas” com aquò se ditz aus escacs, qu’ei constituït de tres encontres. Lo tresau, pervist com un maishant signe per l’11 de noveme (!) ne’s joguèc pas, pr’amor las federacions que preferiscon estauviar las còstas d’ostaleria e de restaurant sus un periòde drin longuet. Entà sauvar la cara deu tornei, la dusau plaça qu’estoc balhada ad Alemanha pr’amor deu nombre de punts marcats. Que recebràn la medalha d’argent.
 
1908: Los jòcs èran pervists a Roma, mès la natura n’ac avèva pas volgut atau, e un eveniment inatendut, l’erupcion deu Vesuvi en 1906, que’us hascoc vàder impossibles. Londres que’us arcuelhoc a huta mentre un tornei vertadièr de rugbi qu’èra pervist. Per malastre, Africa deu Sud e Navèra Zelanda declinèn la convida. Escòcia, Irlanda e Galas, en desentenut dab Anglatèrra tanben. França, convidada tanvau los autes e totun campion olimpic en títou, se desencusèc que ne podèva pas apitar ua esquipa valedèra. Los Australians, aperats oficiaument “Australasia” (dens las autas disciplinas que formavan ua sola esquipa dab Navèra Zelanda), mès totun dejà enchafrats los Wallabies, qu’èran lavetz en virada, doncas qu’acceptèn dab plaser. Cau créser que representar lo son país aus Jòcs Olimpics n’estoc pas jamei un aunor per un jogador de rugbi, s’òm espia sonque la dificultat de trobar esquipas e volentaris. Aqueste còp, lo Reiaume Unit que presentèc l’esquipa arribada purmèra dens lo campionat deus comtats: la deu comtat de Cornoalha. De mei, l’estela de l’epòca, lo Barry Bennetts ne podèva pas jogar. Fin finau, Australasia que batèc Cornoalha sus l’escòra de 32 a 3 lo 26 d’octobre suu terrenh deu Shepherd Bush Stadium.
 
- Medalha d’aur: Australia + Navèra Zelanda shens Navèra Zelanda,
- Medalha d’argent: Comtat de Cornoalha,
- Medalha de bronze: degun.
 
Caotic, ça’vs disèvi..
 
De seguir




 



publicitat
BANNER1 - OPLO erasmus



Comentaris


No hi ha cap comentari




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions