CAPÇALERA: Generalitat de Catalunya
CAPÇALERA2: IEA-AALO

Jornalet, gaseta occitana d'informacions

Dissabte, 23 d'octòbre

Joan-Marc Leclercq

Dimars, 27.7.2021 03h00

Vaccinacion e estela jauna


Comentaris 13 comentaris    
Dolent Fluix Bo Molt bo Fabulós (11 vòtes)
carregant En cargament





Dens las purmèras manifestacions contra las decisions de Macron deu 19 de julhet apareishón escritèus suus quaus èran comparats lo passaclau sanitari a l’estela jauna impausada aus Jusius pendent l’aucupacion alemanda (1940-1944).
 
Aquesta comparason butèc mantunas personas de bona fe (en particular Joseph Szwarc, un rescapat deu Vel d’Hiv’), mes uns mèdias ne profieitèn tanben per ne hèr lo subjècte màger, en tot evitar de parlar de la mira de las manifestacions e denonciar çò qu’èra pas, fin finala, que lo hèit de quauques manifestants. Mes aquò’s pas una nautat.
 
De mon costat me soi dit a la debuta qu’èra pas qu’una comparason esculada mantuns còps, dempuèi lo famós “CRS = SS” de mai de 1968. Una mena de reductio ad Hitlerum aisida que traís una manca d’imaginacion e que s’amerita un punt Godwin. Qui, un jorn, devath un truc de malícia dabans çò que’vs sembla un abùs de poder, a pas jamès tractat quauqu’un de nazi? Comparason es pas rason, mes es meslèu costumèr.
 
Comprengui que l’evocacion de la Shoah es quicòm que hè tornar patidas vecudas o eretadas e las reaccions estón vivas.
 
Puèi, en tot me brembar la cronologia deu regime de Vichèi, me soi dit que los qu’avèvan escritas las pancartas s’èran enganats istoricament, mes comprengoi çò que’us avèva traucat lo cap. Perdequé?
 
Quan las purmèras leis antijusivas son promulgadas, sèm plan un an e mieja abans las arrestacions e sustot las deportacions. Lo monde son destimborlats per la des·hèita e Pétain, qu’es considerat com un “sauvaire de la nacion”, gaudís d’una mena de pseudolegitimitat, que la majoritat deus deputats, elegits deu pòble, l’an balhats los plens-poders. Una majoritat de Franceses, per malastre, l’an hidança.
 
Las purmèras leis racistas passan entre indiferéncia e sentit que de tot biaish aqueste brave òmi hè tot çò de possible peu ben deu país. N’i pas qu’un tropet que compren de tira l’ignominia de la situacion.
 
Pauc a pauc lo Jusius son hòrabandits d’uns mestièrs, d’estudis, de lòcs publics, de restaurants, d’estanquets, etc … E l’impausicion deu pòrt de l’estela jauna podoc passar lavetz com un biais fin finala mès practic de conta-rotlar eficaçament que non pas de demandar los documents a cadun. Tot aquò hasèva logica dens lo cap de los qu’avèvan pas l’esperit resitent de l’epòca.
 
Es de mau comprénguer uèi lo dia, que coneishèm tota l’istòria de la Shoah, mes a l’epòca la propaganda estatala hasèva un tau trabalh qu’aquestas holias son estadas percebudas per la majoritat com quicòm de quitament necessari. Creada peus nazis, l’imageria sanitària èra sovent utilizada dens las campanhas antisemitas e un vocabulari medicau sovent emplegat.
 
Las estelas jaunas de las manifestacions, s’èran mauagidas, hasèvan meslèu allusion a aquestas interdiccions socialas que non pas a las deportacions de cap aus camps de concentracion.
 
D’un aute costat, fòrça monde, en dehòra tanben deus quites manifestants, se chepican d’un autortarisme de la part deu president deu quau sabèm lo punt de partir mes pas de cap a on vam. Quan Vichèi edicta sas leis racistas en octobre de 1941, degun ac sap pas tanpauc. Italia, Espanha e Bulgaria son aligadas d’Alemanha, mes lors leis antijusivas son mens hòrtas, qui sap sus quin modèle lo vièlh marescau se va arrengar?
 
Es doncas sustot un chepic que s’exprimís.
 
Çò que’m susprengoc dens la manifestacion seguenta de Tolosa, lo 24 de julhet, èra la diversitat sociala representada, en dehòra deus manifestants costumèrs qu’èran pas presents, una mescla de “Sénher Totòm”. E l’eslogan màger èra aqueste còp: NO PASS-aràn.
 
Benlèu de qué daubrir un aute debat …
 
 
 
 
 
abonar los amics de Jornalet
 
 


 



publicitat
BANER1: Generalitat de catalunya



Comentaris

30 de julh 14.47h

#12 Solide qu'as rason, la diferéncia es la causida.
Après, se n'ia qu'an pauc deu virus, dautes an paur deu vaccin, es mauaisit de jutjar.

Mes la tòca de l'rticle èra de díser qu'una mesura discriminanta atau (lo de cap aus Jusius) es pas percebuda a la debuda coma tala, e que, s'estirèm lo temps, l'ignominia se harga pauc a pauc e pas d'un sol còp, d'un biaish que lo monde se'n renden pas totjorn compte. Sovent, lo monde qu'an pas conegut lo periòde se demandan fòrça mès tard : "... Legir la seguida


Valora aquest comentari:   votar positiu 4   votar negatiu 2
Respondre comentari replica Comentari inadequat   Formulari d'abús de comentari

28 de julh 10.51h

Per respondre a l'autor de l'article, la diferéncia fondamentala entre las leis anti-josièus e la lei anti-non-vaccinats me sembla de las fondamentalas. Los pretenduts "josièus" (rapèli que s'agís d'una confession) victimas de las inicas leis anti-josièus (e mai foguèssen estats atèus) non an pas jamai causit d'aver agut los aujòls qu'an aguts. Totun èra çò que lor èra fin finala reprochat, e es per aquò sonque qu'èran condamnats, secutats, exterminats.

Mentre que los anti-vacci... Legir la seguida


Valora aquest comentari:   votar positiu 12   votar negatiu 4
Respondre comentari replica Comentari inadequat   Formulari d'abús de comentari

28 de julh 10.36h

#9 France Info es *gauchiste,… tant coma ieu soi fau monge cistercian, o mai domengan, tè !

Mas al mens, non mancatz d'umor !


Valora aquest comentari:   votar positiu 12   votar negatiu 3
Respondre comentari replica Comentari inadequat   Formulari d'abús de comentari

28 de julh 09.05h

#9 Sia es de se trufar, sia, s'es seriós, es pas seriós :-)
A France Info cada matin i a un convidat que hè propaganda per la vaccinacion per totis donc aus dròlles pichons.
Mes benlèu èra una trufandisa, non pas ?


Valora aquest comentari:   votar positiu 1   votar negatiu 2
Respondre comentari replica Comentari inadequat   Formulari d'abús de comentari

27 de julh 21.14h

#8 france info es complotiste, a mei d'estar gauchiste. votatz macron contre las fake news e contre los obscurantismes ideologistes.


Valora aquest comentari:   votar positiu 0   votar negatiu 7
Respondre comentari replica Comentari inadequat   Formulari d'abús de comentari

27 de julh 17.03h

Mai soi a furgar, mai las causas venon sornas

https://www.francetvinfo.fr/sante/maladie/coronavirus/vaccin/enquete-franceinfo-transparence-sur-les-vaccins-comment-leurope-a-cede-face-aux-laboratoires_4302257.html


Valora aquest comentari:   votar positiu 0   votar negatiu 2
Respondre comentari replica Comentari inadequat   Formulari d'abús de comentari

27 de julh 16.40h

Pichon ensenhador Lo conselh europenc parla plan d'OGM

https://www.consilium.europa.eu/fr/press/press-releases/2020/07/14/vaccine-against-covid-19-council-adopts-measures-to-facilitate-swift-development/


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

27 de julh 11.46h

Lo risc que s’avenguessa de novèlas formas numerics de susveilhança sanitari, es aqui : libertat Sanitari (pass sanitari)

Se la temporada d’excepcion , poriá justificar un attent a las libertats ambe d’aisinas novèlas, es de se rementar l’efièch quicheta plan coneigut en materiá de seguretat, qu’enebis tot retorn enrè.

Atal se poria passar lèu e lís al LS + CI + Carta Vital + siègre a tralh (lo contact tracing)


« Plan mond ençò de nosaus se demandan quora tornarà... Legir la seguida


Valora aquest comentari:   votar positiu 3   votar negatiu 3
Respondre comentari replica Comentari inadequat   Formulari d'abús de comentari

27 de julh 10.23h

#3 Vos, que'm sembla que ne vse'n pausatz pas guaire, questions !


Valora aquest comentari:   votar positiu 6   votar negatiu 1
Respondre comentari replica Comentari inadequat   Formulari d'abús de comentari

27 de julh 08.52h

Plan merces de se pausar de las questions.
Dempuei tot petit avem aprengut que la vaccinacion quò era anodin, que si fasia ren podia pas far de mau.
Recemment ai legit sur internet que dins los vaccins anti covidi li avia de l'oxide de Grafène nano. Quò es sur lo site www.micheldogna.fr (la newlettra de Michel Dogna dau 19/07/2021 intitulada tot s'explica).
D'après un article pareigut sur lo site "orwel City" o lo site "la Columbia"... Legir la seguida


Valora aquest comentari:   votar positiu 0   votar negatiu 10
Respondre comentari replica Comentari inadequat   Formulari d'abús de comentari

5 -10 -20 -tots
1
-
2 >




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: OPLO liceu

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions