Dimars, 7.9.2021 03h00
I a, a còps, moments que son mauaisits de desbrembar. Atau en junh passat, avoi la marrida (o meslèu la bona) idèia d’espiar lo Jornau Televizat d’Arte tot escàs abans lo de França 2.
Lo JT d’Arte daubriscoc sus lo rapòrt de 4 000 paginas deu GIEC, los expèrts de l’ONU peu climat, qu’èra encara mès alarmista que non pas totis los autes auperabans. Pervei mancas d’aiga, exòdes, extinccions d’espècias, ondas de mar violentas, en un mot, un infèrn vertadièr peus dròlles que van naisher en 2021. Un brava part deu jornau i èra consacrada.
Puèi a 20h passi sus la 2. E aquiu, un aute monde se daubrís a mons uelhs estabosits. Lo JT de la cadena nacionala comença en parlar … de l’encontre de butabala que’s va debanar lo medish ser a Munic entre França e Alemanha peu campionat d’Euròpa. Cau díser que l’ahar èra grèu, qu’èra la daubertura de la competicion peus Blaus.
Aquesta anecdòta es fòrça simbolica de l’estat d’esperit dens lo quau sèm. Cau estar clar: quasi tot lo monde se’n fot. Pensi que i a fòrça monde que’s chepican quan vesen los imatge deus aigats o deus huecs, mes l’immensa majoritat a pas pres consciéncia de çò que’s debana. E pr’amor? Pr’amor que’s debana au finestron. Sembla encara luenh.
Totas las politicas engibanadas peus governants dinc ara son pas estadas qu’emplastras sus una quilha, son los rapòrts un après l’aute qu’ac disen. La demission de Nicolas Hulot pròva de plan que la presidéncia francesa a pas brica presa la dimension ecologica.
Lo problèma màger, ça’m par, es que lo sistèma dens lo quau vivèm pòt pas foncionar que par un creish de las activitats umanas, que s’apèra “la creishença”. Sense aquesta “creishença”, tot lo sistèma s’aclapa. E son justament, son las activitats umanas que produsissen lo desrèglament climatic. Doncas sembla evident qu’aqueste sistèma pòt pas reglar lo problèma.
La frasa que’s emplegada tot lo temps quan parlam d’aquò es: “Vam pas tornar a la candèla”. E òc, solide, vam pas guastar nòste confòrt, mes nòstes arrèr-arrèr-hilhs seràn obligats de tornar a la candèla un jorn e que patiràn de çò qu’am pas ren hèit.
Cresi francament que la majoritat i crei pas vertadièrament, e se ditz que los expèrtes se son benlèu enganats sense de poder se l’avoar o se’n rénder compte. Degun tocarà pas un son confòrt tan que serà pas tocat per un malur. Cadun pensa qu’es a l’aute de hèr un esfòrç.
Mes i a totun un pichon esper. Benlèu trobaratz aquò cinic, mes per qu’aquò se bolegue au nivèu internacionau, cau que vilas coma New-York, París o Londres sian tocadas. E justament es lo cas aqueste mes per New-York. Sabèm pas encara se los aigats en Alemanha van poder cambiar la mentalitat deus Alemans e se la resulta de las eleccions ne serà transformada.
Es pas lo quarantenat de mòrts, ailàs, que va hèr bolegar las causas o esmàver los qu’an una calculadera a la plaça deu còr, mes ara los domaus començan d’estar chifrats en dolars. Se ditz qu’aquò costèc mès de 100 miliards de dolars, lavetz que los aigats d’Alemanha hascón pujar la nòta a 22 miliards d’euros.
En tot saber qu’es lo sol biaish de pensar que possedissen nòstes poderoses, es benlèu lo darrèr esper que’ns demòra. O lavetz se’n cau des·hèr lèu.
Comentaris
8 de setembre 16.06h
#4 Adiu Franc,
Quan disi "Tot lo monde se'n fot", es pas pr'amor d'aver espiat un mèdia (sus los quaus as rason), mes mèsleu un sentit qu'èi de discutir dambe lo monde a l'entorn. Tot lo monde se sentís, vertat, despoderat, mes sentissi qu'i a pas degun que vòlia hèr un esfòrç. La causa mès aisida seré de minjar pas de carn, se pòt començar de tira tre lo repaish seguent. Mes non pas. Quand vesi que las vendas de SUV es a pujar, etc ... Es un sentit mès que non pas una analisi.
Valora aquest comentari:
3
0
7 de setembre 18.33h
Fa brave temps que gaiti pas pus las "informacions" sus la 2 o endacòm mai (sustot pas sus C News o BFM Quicòm...) ; quina vergonha aquela television publica pagada amb l'argent del paure colhon de ciutadan per prepausar cada còp una sopa indigèsta servida per presentators-tritzs "Estelas"que tustan milierats d'euros. Voletz un sicut de tria per la "Una" de la 2 ? Aicí l'avetz : la naissença d'un panda al zoò de Trifolhi-las-Aucas.
Valora aquest comentari:
2
0
7 de setembre 12.14h
"Cau estar clar: quasi tot lo monde se’n fot." Car Joan-Marc Leclercq, me permetràs d'èsser un pauc mai mesurat e prudent ? Lo contengut del jornal que ne parlas non es "tot lo mond". Es solament la volontat d'una direccion de cadena televisuala de far passar un messatge mailèu que non pas un autre.
Se prenèm menimosament en consideracion lo contengut del jornal d'Arte, tot çò que fa la riquesa dels qualques potents es lo sistèmi actual s'abausarà lèu fait. An la man mesa subre los... Legir la seguida
Valora aquest comentari:
9
1
7 de setembre 07.34h
Quò es nòstra fauta, quò es nòstra fauta, Quò es nòstra granda fauta!
Tal es lo slogan que l'òm auve dempuei trente ans.
Coma si chacun avia un bocin de responsabilitat dins l'afar, coma si chacun avia un bocin de poder per far quauqu'a ren. Culpabilisan culpabilisan lo paubre bogre que n'i es per ren.
Perqué los medias traitan aquil problem per dessus la jamba? Ente es la democracia dins tot aquò? Tot lo monde sab ben que quò arribara un jorn o l'autre, que disan. Quò es l'apocalip... Legir la seguida
Valora aquest comentari:
0
8
7 de setembre 07.34h
Quò es nòstra fauta, quò es nòstra fauta, Quò es nòstra granda fauta!
Tal es lo slogan que l'òm auve dempuei trente ans.
Coma si chacun avia un bocin de responsabilitat dins l'afar, coma si chacun avia un bocin de poder per far quauqu'a ren. Culpabilisan culpabilisan lo paubre bogre que n'i es per ren.
Perqué los medias traitan aquil problem per dessus la jamba? Ente es la democracia dins tot aquò? Tot lo monde sab ben que quò arribara un jorn o l'autre, que disan. Quò es l'apocalip... Legir la seguida
Valora aquest comentari:
0
8
7 de setembre 07.05h
Poder de compra ecologic?
E consí conciliar le nivèll de vida dambe la proteccion de la planeta, sense parlar del factor demografic ?
E es le consum de çò de ganhat ecologicament legitim ?
Valora aquest comentari:
3
0
1
Comenta
Lo comentari es estat mandat corrèctament
7 comentaris
(6 vòtes)
En cargament
7 comentaris
Mandar
