CAPCALERA: BOTIGA
CAPÇALERA2: mot amagat

Jornalet, gaseta occitana d'informacions

Dijòus, 11 d'agost

Joan-Marc Leclercq

Dimars, 14.12.2021 03h00

Èi tornat víver la vita d’abans


Comentaris 2 comentaris    
Dolent Fluix Bo Molt bo Fabulós (3 vòtes)
carregant En cargament





A còps, en tot viatjar dens nòstra epòca drin segotida, podètz aver l’impression qu’existissen mondes parallèles suu medish continent.
 
Atau la setmana passada anèi a Białystok, au nòrd-èst de Polonha, per hestejar l’anniversari deu creator de l’Esperanto, Ludwik Lazar Zamenhof, que’s naishoc en aquesta vila.
 
Me caloc passar per Munic (Minga en bavarés), qu’i a pas de vòu dirècte. Arribat a l’aeropòrt de la capitala de Bavièra, estoc una mena de tust que m’arcuelhoc.
 
Acerà, totis los distributors de bevudas son desbrancats. Per dintrar dens una botiga, cau estar vaccinat. Pas nada resulta de tèst negatiu es acceptada. Cau estar vaccinat, benlèu positiu, aquò rai.
 
Mes es pas tot. Podètz estar vaccinat, poderatz pas dintrar sense una masqueta FFP2, aquesta que sembla un filtre de cafè. Ne podètz crompar a l’entrada de cada botiga au prètz de 2 per 5 euros.
 
Medisha causa per se sietar dens un estanquet o quitament en terrassa, que son entornejadas de riban negre e jaune.
 
Solide, tot lo monde pòrta la masqueta e la FFP2 es fòrtament majoritària.
 
Per contra, los viatjaires qu’arriban son pas conta-rotlats, vai te’n comprénguer, Carles.
 
Puèi doncas de ser me retrobèi au centre de Białystok, qu’es una vila beròia de visitar s’atz enveja un jorn (véser imatge).
 
E aquiu, auta suspresa, mes au revèrs. “La vita d’abans”. Pas nada masqueta sus las caras, dens lo barri centrau on i a los estanquets e los restaurants, monde joens que dintran e sortissen coma s’èram en 2019. A l’entrada deus bars, pas nada recomendacion afichada, pas nat conta-ròtle de qué que sia, sonque una salutacion, la carta e “Per béver, de qué volètz?”.
 
Atau podoi espiar la purmèra part de l’encontre Legia Warszawa contra Spartak Moscó (0-1 a la pausa se volètz saber, mes coneishi pas la resulta finala).
 
Sabi plan que las duas vilas son plan esluenhadas l’una de l’auta, mes totun dependen administrativament de dus estats que son vesins e que’ s tòcan.
 
Una tala diferéncia de situacion deisha pensar qu’Euròpa es un doç saunei fòrça teoric.
 
Es plan o mai, cadun se pensarà çò que vòu.
 




PS: A maugrat de çò que’s ditz, avèvi tèsts de covid-19 suu corrent, mes ni a Tolosa a la partença o au retorn, ni a Munic a l’anar o au retorn, ni a Varsovia a l’arribada o quitament au retorn estón conta-rotlats.
 
 
 
 
 
abonar los amics de Jornalet
 
 

 
 
 
 
 
 
 



publicitat
BANNER1 - comuna tolosa



Comentaris

14 de decembre 09.28h

#1 Per çò qu'es de la gestion de la crisi sanitària, vertat que l'Estat francés sembla ara mès lo de Petain dens sas presas de decision que non pas a l'Agora grèca.
Macron govèrna dambe un pichon grop de non-elegits, seguís o pas, quan vòu, los conselhs deus expèrts nomejats sabèm pas coma ni per qui, e lo parlament a pas nat mot per díser.


Valora aquest comentari:   votar positiu 3   votar negatiu 1
Respondre comentari replica Comentari inadequat   Formulari d'abús de comentari

14 de decembre 07.42h

Sem entrats dins lo fascisme sens s'en rendre compte. Coma disia un suisse a l'emission doctothon sur lo site http://www.doctothon.com : "Le silence des pantoufles est plus grave que le bruit des bottes".
Conectatz--vos a doctothon per vos far una idéïa differenta sur la crisa dicha sanitaria.


Valora aquest comentari:   votar positiu 2   votar negatiu 6
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




D'autres articles


Jornalet, gaseta occitana d'informacions