Dimars, 20.12.2022 03h00
La setmana passada am parlat d’Esperanto. Un deus avantatges de la lenga internacionala es que vos balha un panèu d’amics de pertot dambe los quaus podètz escambiar e atau, auratz un vejaire diferent de çò que’s pensa generalament dens vòste país.
Sovent, ara, quan parli de çò que’s debana dens l’Estat francés, uns estrangèrs son estabosits qu’aquò posca existir dens un país que’s vòu totun lo lum de l’umanitat en mestior de libertat e de drets umans. Vaquí una pichona lista de çò que pòt susprénguer monde d’Euròpa deu nòrd sustot:
1/ Nòste president hè passar leis mercés a una engana permetuda per la constitucion que s’apèra lo 49.3 e deisha atau lo parlament despoderat. La lei sus las retiradas, que la majoritat deu monde vòu pas, passarà atau.
2/ L’organizacion de la copa deu monde de fotbòl, que devèva estar balhada aus Estats Units mes que, après una amassada entre Nicolas Sarkozy, Michel Platini (lavetz president de l’UEFA), lo prince deu Qatar e d’autes, estoc atribuïda au Qatar contra la creacion de Bein Sport, la crompa deu PSG, d’uns avions de caça franceses, e sens de dobte uns "devaths de taula" (francisme per "devath de man") que passavan pas devath la taula, tan èran gròsses.
3/ Lo ministre de la Justícia es estat metut en examen per presa illegala d’interèsses, mes guarda son ministèri a maugrat de çò que prometoc lo president Macron en campanha electorala, que cada ministre metut en examen devèva demissionar. Mes eth a pas demissionat.
4/ Lo ministre de l’Interior a obtengut avantatges sexuaus de duas hemnas, en particular d’una contra l’atribucion d’un lotjament sociau quan èra conse de Tourcoing. Pleitegèc lo consentiment. A pas demissionat. Aquò’s mauaisidament imaginable dens uns paises, en particular los de culture protestanta.
5/ Lo president de la Federacion Francesa de Rugby es estat condemnat per corrupcion. A pas demissionat. Lo president de la Federacion Francesa de Fotbòl es acusat per emplegadas d’aver mandat messatges sexuaus e exercit una pression. A pas demissionat.
6/ Una enquista es en cors suus rapòrts estranhs entre Emmanuel Macron e lo gabinet Mc Kinsey, una perquisicion au local de son partit es estada miada. Pauques coneishen l’informacion.
7/ Las 15.000 personas que son estadas hòrabandidas de lor trabalh sens salari son pas tornadas en foncion. Aquò se hè pertot on èra lo cas (Italia, New York, Canada) e lo govèrn d’Alberta a quitament balhat sas desencusas. Aquesta situacion es contrària a las leis deu trabalh, e una sofrològa s’i es escaduda de ganhar son procès, serà reintegrada e crubarà lo salari correspondent.
8/ Es ara causa sabuda que lo govèrn establiscoc un "pass vaccinau" sense nada basa scientifica. Lo 10 d’octobre de 2022, Janine Small, responsabla per Euròpa de la firma Pfizer, a explicat publicament au deputat europenc olandés Rob Roos, qu’an botat suu mercat lor product sens nat ensai sus la transmission. E Libération, uns jorns mès tard, expliquèc qu’aquò èra coneishut tre la debuta. Doncas la politica de perméter a portaires potenciaus de contaminar los autes en tot interdíser monde testats negatius deveré au mens estar debatut publicament. Dens un país normau en tot cas.
Vaquí una pichona seleccion (la lista es mès longa) deus subjèctes que son estats benlèu amagats per la Copa deu Monde e que, de l’estrangèr estant, semblan fòrça estranhs, lavetz qu’aquí, aquò hè pas tròp los grans debats de l’actualitat e tot sembla normau.
Comentaris
22 de decembre 20.48h
#15 Soi pas segur qu'ajatz plan comprés de qué s'agís. Hòrabandir de son trabalh quauqu'un sus la basa d'una opinion en tot se rénder compte qu'avèvan rason...
Au contra, l'Estat a atau permetut a personau vaccinat e doncas potencialament portaire e transmetaire deu virus aus malauts, tot aquò a sense de dobte causadas mòrts. Per contra, lo personau non-vaccinat mes testat, qu'èra pas dangerós, es estat interdit de trabalhar.
Estosse pas qu'una sola persona, seré estat un escanda... Legir la seguida
Valora aquest comentari:
4
0
22 de decembre 17.23h
#14 tòrt de qué ? L'Estat a lo drech d'aguer d'exigéncias per lo personau qu'emplega. Lei gents que lei vòlon pas complir son pas forçadas de trabalhar per eu. Podem trobar aquò excessiu mai es en ren un escandau d'Estat (e concernís una part pichonèla dau personau concernit).
Coma que vague, aquela obligacion serà probable levada dins quauquei temps. Per ieu es un faus subjèct, en tot lo cas. Ren de veire amb lei promiers ponchs evocats dins l'article.
Valora aquest comentari:
1
0
22 de decembre 16.34h
#13 Quitament quan l'Estat sap qu'a tòrt e qu'aquò's provat ?
Valora aquest comentari:
5
0
22 de decembre 16.09h
#12 lo monde que trabalhar dins les espitaus son talament assabentats de coma foncionan lei vaccins que son estats vaccinats a mai de 99,5% amb lei vaccins còntra lo covid
Lei personas que ne'n parlas son en ren representativas dau personau espitalier. An lo drech d'aguer son opinion e degun leis empacha de trabalhar en realitat mai l'Estat a tanben lo drech d'aguer d'exigéncia rapòrt ai personas qu'emplega.
Valora aquest comentari:
1
0
22 de decembre 15.52h
#11 Lo monde que trabalhan dens espitaus son pas contra los vaccins, son vaccinats dempuèi longtemps per poder trabalhar. An una mauhidança de cap a un producte qu'es estat preparat en 6 meses, en contra de tot çò que's hè en mestior scientifica, on cau au mens 10 ans per s'assegurar de l'eficacitat e de la non-dangierositat d'un producte.
Se consideram qu'aquò es una opinion, les empachar de trabalhar, d'estar pagats es un hòrabandissament de persona pr'amor d'una opinion, com a quò s... Legir la seguida
Valora aquest comentari:
4
0
22 de decembre 13.46h
#10 es tanben una question ideologica. Coma trabalhar dins un service espitalier se creses que lo vaccin es ineficaç, que siás pas lèst de far de concessions, que te mesfisas de la sciéncia e coma trabalhar per l'Estat se consideras qu'aquel estat metriá en plaça una politica per enverinar sa populacion ?
Es un afar de gestion de ressòrgas umanas, es pas un escandau d'estat.
La gran majoritat d'aquelei 15 000 personas (en realitat n ben mens de 15 000 ara, quaquelei chifras son de fin ... Legir la seguida
Valora aquest comentari:
4
0
22 de decembre 12.19h
#9 Se parla de 0,5% deus suenhents mes de 15.000 personas, i a dautas professions, es pas ren tampauc. Dens los autes paises se son rendut compte qu'èra una error (lo vaccin èra pas estat quitament testat e se muishèc particularament ineficaç sus la tranmission) e an restablit lor error. Aquí, non pas. E vertat, lo monde vòu virar la pagina, aquò sauva peu moment los qu'an gerida la crisi.
Valora aquest comentari:
1
0
22 de decembre 11.31h
Siam a la fin de 2022. Aquelei subjècts (ponchos 7 e 8) la gran majoritat dei gents s'en chautan.
Onestament, lo detzenar de milierat de fonccionaris espitaliers que refusan un vaccin mi paresse normau de pas lei tornar integrar. Parlam de 0,5% deis efectius. Per ieu es pas un afar d'estat.
Leis autrei ponchos mi pareisson pus problematic aquò estent dich es pas gaire l'impression que lei governs estrangers siguesson mai vertuós.
Valora aquest comentari:
2
0
22 de decembre 10.35h
#6 Lo pass sanitari o vaccinau ? I a una bèra diferéncia. Ma hemna es polonesa e quan parlatz aus Poloneses de çò que's debanèc en França, les es mauaisit de comprénguer com quicòm atau estoc possible. An pas agut de pass vaccinau ni tampauc sanitari, e pas mès de mòrts o de malauts en percentatge.
Valora aquest comentari:
1
0
22 de decembre 10.29h
#6 Quan viatgèi en Espanha a la fin de 2021 e non pas de 2022, plan segur...
Valora aquest comentari:
0
0
Comenta
Lo comentari es estat mandat corrèctament
16 comentaris
(8 vòtes)
En cargament
16 comentaris
Mandar
