CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Dimècres, 18 de setembre

Joan-Marc Leclercq

Dimars, 17.6.2014 03h00

Los pegasses (uroses) que son nascuts en quauque lòc


Comentaris 7 comentaris    
Dolent Fluix Bo Molt bo Fabulós (8 vòtes)
carregant En cargament


Aquò que devèva arribar. Ac podèvam pas evitar. E haut, au parat deu debat sus la refòrma territoriala, apareishó sus un hialat sociau una remarca drin trufaira: “Los que dehenen lor region me hèn pensar a la cançon de Georges Brassens: Les cons qui sont nés quelque part, aquò seguit peu ligam dambe la dita cançon en vidèo. En vertat, la cançon s’apèra “Cançon deu monde que son nascut en quauque lòc” e lo repic ditz “lo pegasses uroses que …” e critica los chovinistas.

Me cau con·hessar que l’autor d’aquera frasòta es un deus mens amics deu Líber de Caras, quauqu’un de fòrça interessant e simpatic çaquelà, dambe bonas idèas progressistas, mès que “bloqueja” sus aquesta question coma fòrça monde dens la patria deus Drets de l’Òmi que se son deishats convéncer que la Libertat apareishó a la susfàcia de la Tèrra en 1789.

Son un bon nombre de pensar que, a maugrat de lor daubertura d’esperit qu’es totun vertadèra, prononciar lo mot “occitan” hè de vosautes un quasi-sòci deu Ku Klux Klan o quicòm d’aparentat.

Ende muishar de plan la complexitat d’un tau biaish de pensar, es la medisha persona que, un jorn, me demandè la revirada d’un tèxte de Moussu T dambe la mira de la cantar. Tot es pas néguer, tot es pas blanc tanpauc.

Responèi doncas a mon amic que lo brave Georges èra tanben l’autor de la famosa “Suplica end´estar enterrat sus la platja de Sèta”, que pròva plan que cau pas tostemps seguir un mèste de pensar que pòt tamben aver sons floishèrs o sas reviradas, e que se “tot es dens tot, e tamben lo contari”.

Aquesta cançon que torna sovent coma argument. Coma se Brassens possediva la vertat e lo hèit de’u citar vos balhava rason un còp per totis.

En fàcia d’aqueste tèxte deu brave Georges, podèm perpausar lo suberbèth “País plat QU’ES LO MEN” deu pas mensh respectable Gran Jacme. Brel shens Belgica? De qué ne demoraré?

Que serén las òbras de grans compausitors shens lor país? Imaginatz cinc minutas au Gilles Vigneault shens deu son Quebec, l’Alan Stivell shens radics celtes, las òbras de Liszt shens Hongria, Enrico Macias pas patanegra, Marceu Amont pas biarnés, Claudi Nougaro shens Ô Toulouse, lo Charles Aznavour shens sa soca armeniana e las compausicions deu Francis Lemarque (nascut Nathan Korb) shens las influéncias de las melodias yiddish e russas qu’an breçat son enfança, Luis Mariano shens lo Bascoat, etc.... Totis colhons nascuts en quauque lòc?

E seré tamben interessant de demandar, se las cançons que pòrtan la mencion “París” son consideradas coma portairas d’una peguessa localista. Vai-te’n saber.

Es vertat que l’importància deus radics e de la cultura, aquò es de mau comprénguer ende monde que son nascut “enlòc” o dens l’espaci-temps d’una auta dimension.



publicitat
BANER1-2-3: DGPL TRADUCTOR



Comentaris

20 de junh 14.48h

A vosautes tanben qu'i avó un con que vs'enviè a la gula "Les imbéciles heureux qui sont nés quelque part"? Que credèvi estar lo sol...
Qu'ei amusant totun de véder en çò de gens que's vòlen d'esperit libre ua referencia tan politicament corrècte com Brassens!
Mes atau qu'ei, qu'en i a que n'aiman pas sonque las culturas d'importacion. Los mens collègas "bobos" e universalistes que son ahuecats quan s'ageish de deféner (verbaument plan segur!) los tibetans, los curds, los cabiles e ... Legir la seguida


Valora aquest comentari:   votar positiu 0   votar negatiu 0
Respondre comentari replica Comentari inadequat   Formulari d'abús de comentari

18 de junh 00.24h

Qu'es plan portat ara non pas d'estar vadut en quauque lòc e de n'estar ufanós mès d'aver originas divèrsas (com un pair rus e ua mair brasilèra). Atau que pòden díser que ne son pas vaduts simplament com los autes : en quauque lòc !
A cadun las soas referéncias… Gensemin, lo poèta perruquièr d'Agen – que los sons amics venen de festejar lo sesquicentenari de la soa desaparicion – qu'escriu (e que l‘a contat plan sovent dens los sons recitals poetics) dens « Mos sovenirs ... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

17 de junh 23.39h

E òc, lo "patriotisme local" es totjorn mal percebut e sustot mal comprés, amai pels occitanistas; sovent pas plan assumit.

E ça que la, una granda part dels occitanistas o son devenguts per un estacament a de personas, sovent; mas tanben a un territòri, que nos fa literalament vibrar... Mas aquò, pauques o gausaràn dire, e preferiràn vendre l'occitan coma un mejan de melhor parlar espanhòl.

Las vertuts d'une identitat fòrta portada collectivament son pasmens plan nombrosas : dinamis... Legir la seguida


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

17 de junh 14.51h


#2 E oc, lo personatge avia sas contradiccions, coma nautres totes. E la contradiccion, la trobam dins la quita chançon que parlam, d'abord que se vei que se se pot aplicar a tots los chauvinismes, incluis dins la categoria los de las "patrias" capablas de far la guèrra, ço qu'incluis pas vertadierament los Occitans. Es un detalh que los que nos mandan aquo au morre deurian benlèu meditar, lor ajuaria a compréner de causas. E de tot biais, volrio ben rescontrar un jorn quauqu'un que ser... Legir la seguida


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

17 de junh 13.54h

La melhora conclusion es la plaja de Seta. Coma qué, deu mei sabem causas, deu mei sèm libres, de causir e de non pas subir !


Valora aquest comentari:   votar positiu 2   votar negatiu 0
Respondre comentari replica Comentari inadequat   Formulari d'abús de comentari

17 de junh 09.43h

Voei... Aquesta frasòta es l'alpha e l'omega deis argumentacionistas (!) anti-lengas regionalas. Evidentament, prenon solament çò que leis interessa dins l'òbra de Brassens.

M'agrada tanben, a mai de la cançon per èstre enterrat sus la platja de Sèta, de li ramentar (puei que soventei fès s'auto qualifican de "progressistas") que Brassens cantèt tanben de paraulassas omofòbas fòrça violentas dins sa caçon dicha "Les Trompettes de la renommée"., paraulas que lei renegarián pas le... Legir la seguida


Valora aquest comentari:   votar positiu 7   votar negatiu 0
Respondre comentari replica Comentari inadequat   Formulari d'abús de comentari

17 de junh 08.17h

Un brave article!

Benlèu qu'aqueles que critican los cons nascuts endacòm son unes colhons, o colons o tot simplament unes braves cons. Lo quite brave Brassens cantava que " lo temps compta per una peta, quand òm es con, òm es con"

D'amics que, subte, venon mens amistoses quand parlam d'Occitània, se'n trapan a bodre. Çò segur es que lor conariá es d'una qualitat universala.

Son pas de monde interessants: Occitània e pro!


Valora aquest comentari:   votar positiu 11   votar negatiu 2
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER1-2-3: DGPL DICTADES

Perfil

Joan-Marc Leclercq

Joan-Marc Leclercq logo rss

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

mai d'informacions

contactar l'autor

Categorias

Las mai...


Mai d'articles

Archius




Etiquetas

D'autres articles


Jornalet, gaseta occitana d'informacions