Divendres, 15.11.2013 03h00
Pont ar Veuzenn lo 26 d’octòbre, Kemper lo 2 de novembre: la Bretanha coifada d’un bonet roge e Gwen a Du a la man manifesta contra la taxa camion –dicha ecotaxa– e per sauvagardar l’emplec. Avem legit sus Jornalet daus articles d’opinion mai que mai autonomistas sus que subjecte. Voudriá apondre aicí un punt de visda ecologista. Passarai sus la recuperacion dau movement de Ségolène Royal a l’extrema drecha francesa, sus la crisi d’urticari que balha aus sociauchauvinistas coma Mélenchon o sus lo debat marxista de l’oportunitat de participar a un movement petit-borgés. Passarai tanben sus la modernizacion capitalista dau concepte de fermier generau. Abordarai dos punts: çò qu’implica dau punt de visda ecologista la revendicacion de sauvagarda de l’emplec dins lo sector agroalimentari breton d’auei e l’interet ecologic de la taxa camion.
Kristian Troadeg, mera de Karaez (Centre Bretanha) e animator dau movement daus Bonets Roges, declaret au jornau francés Mediapart: “Exigem pas nonmàs la suppression de l’ecotaxa, mas tanben la fin dau dumping sociau qu’es a esbolhar totalament l’industria bretona emb una concurréncia inacceptabla tras l’Euròpa (...). Auei daus tuadors alemands, polonés, daus trabalhadors low cost daus país de l’Est son paiats 5 euros de l’ora, quand en Bretanha sem paiats 16 euros minimum de l’ora. Coma resistir?” La question es mai que justa. E la responsa ecologista serà pas aisada a acceptar. Lo movement daus Bonets Roges se plaça dins lo sistema productivista mondializat. La concurréncia i es ferrotja e los impactes sociaus e ecologics mai que greus. E zo vesem en Bretanha: la region es en plen dins la crisi sociala e environamentala que provoca. Perta daus emplecs, pollucion de l’aigas, algas verdas. Sens parlar de la consequéncias en defòra de Bretanha, e mai en defòra d’Euròpa: l’industria agroalimentària europea, boostada a las subvencions, vend sos produchs dins los merchats dau Sud, en fasant aitau una concurréncia desleiala a las produccions localas. Defendre l’emplec, de segur, mas pas per trobar los polets bretons sus los merchats de las capitalas africanas. N’i a pas, dau punt de visda ecologista, de solucion dins queu sistema. Ne’n fau sortir. Mas coma?
Quau deu èsser l’objectiu? La relocalizacion economica que permet de gardar l’emplec, de redusir l’impacte daus camions sus lo chamjament climatic en trobar los clients sus plaça pusleu que d’importar la noiridura qu’exportem alhors. Per l’eurodeputat e ancian sindicalista agricòla José Bové, “l’ecotaxa es lo sol biais de relocalizar l’emplec en Bretanha”. Adonc, fau veire çò que se passa dins los país qu’an una taxa similara: Alemanha, Austria, Soïssa, … La taxa camion i serv mai que mai a financiar l’entreten de las rotas. P’un plan de reconversion ecologic mercés a ‘quela taxa. Pas tanpauc de vertadier chamjament dins l’organizacion economica o los transpòrts de las merchandisas. En França, 750 milions d’euros seràn versats a l’AFITF (agéncia de financiament de las infrastructuras de transpòrts en França) e 150 a las collectivitats localas per lors rotas. Quantben serviràn vertadierament aus transpòrts fluviau e ferroviari?
Bretanha, coma d’autres territòris europeus, deu s’engatjar dins la reconversion ecologica de son economia. Quò vòu dire que l’industria agroalimentària bretona actuala deu disparéisser. Mas pas violament coma quò se passa auei. Bretanha a mestier d’un plan de reconversion, concertat, que permetrà de conservar e de renforçar l’emplec e de meliorar la situacion environamentala. De las revendicacions que fan pas partida malaürosament de las daus Bonets Roges.
Comentaris
18 de novembre 16.18h
Fasetz me excusa per ma repsonsa tardiva
#1 Efectivament, n'i a un trabalh de far sus las alternativas a la rota. Emb lo ferroviari per exemple.
#3 l'ecotaxa es mas un pretexte a la revòlta. Es pas lo problema vertadier. Lo problema vertadier es la crisi dau sector agroalimentari en Bretanha. E lo problema de l'ecologia politica, dins queu contexte, es de far comprener que sauvagardar quel emplec es pas la solucion per Bretanha. Fau una transformacion ecologica dau sector agroalimentari. E m... Legir la seguida
Valora aquest comentari:
2
0
17 de novembre 06.30h
«Sens parlar de la consequéncias en defòra de Bretanha, e mai en defòra d’Euròpa: l’industria agroalimentària europea, boostada a las subvencions, vend sos produchs dins los merchats dau Sud, en fasant aitau una concurréncia desleiala a las produccions localas.»
Es vertadièrament immoral, segur. Ne cal acabar amb la PAC e trobar un mejan perque los agricultors pòscan viure correctament de l'or trabalh, amb la pensada a long tèrme qu'es una produccion mai ecologica.
Una causa ça... Legir la seguida
Valora aquest comentari:
2
0
16 de novembre 21.38h
#4 Per contra, los dirigents son incomparablament mai ecologistas, non?
Valora aquest comentari:
0
0
16 de novembre 21.36h
#3 En guardar en cap que las preocupacions popularas e son sovent hòrt aluenhadas de l'ecologia.
Valora aquest comentari:
0
0
16 de novembre 17.25h
Avèm besonh d'una ecologia politica que siá pròcha dei preocupacions popularas. Lo problèma es pas l'idèa d'ecotaxa. Lo problèma que lo govèrn francés, amb EELV, impausan l'ecotaxa de maniera abstracha e tecnocratica, sens comprene lo pòble breton.
Ara una partida dau pòble occitan tanben comença de se mobilizar còntra l'ecotaxa.
Valora aquest comentari:
2
2
15 de novembre 10.48h
Le prophétique Luc Besson avait raison sur toute la ligne. Quand il a réalisé son célèbre film sur la vie sexuelle du grand schtroumpf, Le Gland Bleu, il nous avait bien décrit ce vieillard libidineux écumant la forêt de Paimpont et engendrant une race nouvelle de gnomes. Les voilà dans la rue!
A moins qu'ils ne soient que des rejetons du commandant Cousteau?
Valora aquest comentari:
6
2
15 de novembre 09.12h
Calriá que los transpòrts de las merças se faguèsson ambe lo tren. Ja que l'SNCF prepausava un servici merdicós un còp èra. Mas es vengut pièger ara. Ambe la liberalizacion del transpòrt ferroviari, vesèm a passar en çò nòstre fòrça trens que venon de l'Euròpa sancèra (basta de gaitar las locomotivas per se'n mainar). L'SNCF prepausa pas res pus (o pauc se'n manca). Aquí perqué en Bretanha o endacòm mai, son los camions qu'o carrejan tot ... Sèm encara luènh de la revoluci... Legir la seguida
Valora aquest comentari:
4
2
1
Comenta
Lo comentari es estat mandat corrèctament
7 comentaris
(5 vòtes)
En cargament
7 comentaris
Mandar
