Bandièra01 1180x150: Comuna de Tolosa

Opinion

Un hooligan, un vòte

“Banda de carrònhas, es la guèrra! —nos dison—. Los anam abordar, los salòps de la patria nº 2, e los anam petar la clòsca! Anem! Anem! I a tot çò que cal a bòrd! Tots en còr! Mas abans butatz un bramal que faga tremolum: Viva la Patria nº 1! Qu’òm nos entenda plan luènh! Lo que bramarà mai fòrt, aurà la medalha e la dragèia del bon Jèsus!”
 

Dimenge lo 1r d’octòbre, lo jorn del referendum, i aurà almens 12 000 efectius de la dicha Polícia Nacionala espanhòla e de la Gàrdia Civila. Semblariá que los 16 783 Mòssos d’esquadra son pas tròp fisables. Las chifras normalas èran 2800 efectius de la polícia dicha nacionala e 3500 de la Gàrdia Civila en tot Catalonha. Los novèls venon per empedir lo referendum e semblariá que i van demorar qualque temps. I a de qué far.
 
La màger part d’aquela polícia e polícia militara es ja arribada en Catalonha, e se tròba acantonada per lo país e embarcada dins d’aigas del país. Son per exemple los naviris MobyDada, Rhapsody e Azzurra que pòdon aculhir 5000 agents que degun pòt pas o vòl pas aculhir. Lo MobyDada es vengut plan famós.
 
Lo procés independentista catalan de còps nos regala d’imatges risolièrs.
 
Es pas seriós d’embarcar fòrças de repression dins un naviri del Looney Tunes, vertat? Tweety, Daffy Duck e Coyote fan pas trapar la petarufa pel moment. Ai dich ben, “pel moment”.


 
Mas lo procés independentista catalan de còps nos regala d’imatges pas gaire edificants.
 
La policia arriba a Catalonha, arriba discretrament, mas totun sa sortida es estada abans un espectacle. Las sortidas del còsses de policia e policia militara dempuèi de divèrsas vilas coma Còrdoa, Sevilha, Huelva, Cadis... an vist importantas concentracions de sosten. De concentracions improvisadas e organizadas WhatsApp e Facebook. Demest las fòlas, las proclamacions mai entendudas son estadas: “sètz pas solets”, “Catalonha es Espanha”, “Viva Espanha”, “Puigdemont a la preson”, “ieu soi espanhòl, espanhòl, espanhòl”, “a eles, oè” (aquel es d’inspiracion fotbolaira)... Aquò fa pas rire.
 
En vesent las chormas protagonistas del vidèo ai pensat a Viatge al cap de la nuèch, de Louis-Ferdinand Céline. Marrida persona, bon autor. Segurament lo legidor de Jornalet aurà reconegut la citacion qu’entamenava l’article.
 
Benlèu qu’aquelas chormas qu’aclamavan la polícia que partís luènh per empachar los dreches dels autres an pas legit Viatge al cap de la nuèch; e benlèu qu’an pas jamai legit Céline; e benlèu qu’an pas jamai legit que que siá aprèp l’escolarizacion obligatòria... Mas aquel monde existís, e —cal pas s’enganar— es nombrós. Aquel monde a pas jamai bastit que qué sia, mas aquel monde a una opinion, e vòta. Un òme, un vòte.
 
Sos elegits los prendràn en compte. 

 
 
 



abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pierra Arties
7.

Es pegaries ies que ditz aguest jan son dangeruses.
Tot un ei un raciste catala que enlurdis era nosta istoria gascona.

  • 0
  • 0
Josú El Carajo
6.

Sabi que Andalosia es jos un govern regional dels socialistas, mas tanben an mantuns drechans en aicesta comunautat, doncas las falordariás dels vidéos. Ieu pot compréner pas lors biaises de pensada car Andalosia es, mercés a la drecha e la dictatura, una tèrra marrida. Creson que anan a la guèrra, mas son d'asenadas drechanas.

  • 1
  • 1
Manèl Zabala Bcn
5.

#3 Mercègi de còr vòstre comentari. Sètz persona d'esperit.

  • 5
  • 1
Mèfi! 31
4.

Andalusia, tèrra de "flics" e d'esmigrats en Catalonha, fòrça gents de ren, coma diriá Macron.
Misèria manipulabla coma pertot...
Lo reialme d'Espanha jòga amb lo fuòc...

  • 6
  • 1
El toro
3.

F. Garcia-Lorca èra Andalós. An pas jamai perdut l'esperit, ni lo cervèl. Los traucs, los a aguts a la pèl. Èra pas coma aqueles braus que designan l'article. N'es mòrt. Definitivament. El, si qu'èra Andalosia ! Aqueles, son d'ases decerebrats, ras mai.

  • 12
  • 1

Escriu un comentari sus aqueste article