Dissabte, 23.2.2013 03h00
La FIFA, coma organ sobeiran dau fotbòl mondiau, organiza lei competicions internacionalas dempuei quasi un sègle ara. La politica a dempuei totjorn una granda influéncia sus lo fotbòl e la reparticion geografica deis esquipas nacionalas nos a quauquei còps reservat de polidei suspresas.
La mai granda d’aquelei es l’istòria de la federacion de fotbòl d’Israèl. Joguèt lei torns preliminars de Copa dau Mond en 1950 e 1954 amb l’UÈFA (Euròpa doncas), puei amb Asia partent de 1958. Averèt la Copa d’Asia dei Nacions a domicili en 1964, mai après la Guèrra dau Kippur, lei país arabis vesins refusèron de jogar còntra Israèl que foguèt fòrabandit de la confederacion asiatica. Pendent mai de vint ans, aquela esquipa va conéisser diferentei partidas dau Mond. D’efiech, Israèl, qu’es situat au Pròche Orient, participèt ai qualificacions de la Copa dau Mond de 1990 amb la confederacion d’Oceania! Acabèt primier mai perdèt mai tard en barratge còntra Colómbia. Dempuei, Israèl es tornat dins la confederacion d’Euròpa.
Quant a la federacion de fotbòl de Palestina, e mai siá pas encara un Estat, es reconeguda dempuei 1998 per la FIFA, e doncas membre de la federacion asiatica. Fau tanben notar que Turquia, candidata a l’adesion a l’Union, jòga dempuei 1962 dins la confederacion europèa, coma Russia que pasmens son territòri es majoritàriament sus lo continent asiatic.
Darrier exemple d’estrangetat geografica amb Austràlia, que fa pas mai partida de la confederacion d’Oceania dempuei 2006. A decidit de jónher lei país asiatics, segon ela per facilitar sa qualificacion a la Copa dau Mond. Per aquò, dempuei 2007, la federacion de fotbòl australiana participa a la Copa d’Asia dei Nacions.
Comentaris
2 de març 12.57h
E pensi la federacion de Gibraltar es pas un estat independant, e tanben a jògat partidas internacionalas.
Valora aquest comentari:
0
0
23 de febrièr 12.48h
E, subretot la Fifa a mai de nacions afiliadas que l'ONU ! Escòcia, Irlanda dau Nòrd, Pais de Gallas an d'equipas nacionalas e son pas d'Estats independants !
Valora aquest comentari:
3
0
23 de febrièr 12.47h
As tanben Japon que jueguèt la Copa America coma "convidat", me sembla...
Valora aquest comentari:
3
1
1
Comenta
Lo comentari es estat mandat corrèctament
3 comentaris
(3 vòtes)
En cargament
3 comentaris
Mandar
