Opinion
"Marseille Provence 2013": Qunta plaça per la cultura occitana e a qunt cost?
L'atribucion dau títol de Capitala Europenca de la cultura a Marselha ven donar un novèu còp de lume sus la mai gròssa ciutat d'Occitània. Aquel eveniment sostengut per lei grandeis institucions localas, nacionalas e, segur, europencas, se ven apondre au "grand tramblament" que ven gançalhar la vièlha ciutat focèa.
D'efiech, lo concèpte de capitala europenca de la cultura a pas per ambicion de far mòstra dei particularitats da cada ciutat causida. A l'entorn d'aqueu projècte e sota l'embarnís de la cultura, se li ven apondre una reflexion generala sus l'organizacion d'un territòri. D'aqueu costat, MP13 fa pas excepcion, estent que ven far doblon ambé l'Operacion d'Interés Nacionau d'Euroméditerrannée, vouguent far de l'ancien espaci industriau d'Arenc, au còr de Marselha, un pòle terciari d'importància internacionala.
Adonc, MP13 s'apueja sus de grandei renovacions urbanas, coma l'ancian silò d'Arenc, devengut encuei una sala d'espectacle modèrna, tancada au mitan d'un quartier que sa vida nocturna es gaireben inexistanta, e que li ven renforçar l'ofèrta d'entertainment culturau que menavan ja lei Docks des Suds, un parèu de còps cada annada.
Per lei pichonei estructuras culturalas marselhesas, lo prètz-fach es estat cargat. Una granda part d'elei veguèron sei subvencions publicas demesidas, de còps suprimidas tot simple, que lo finançament d'aqueu grand barnum manjava la part gròssa dei liquiditats disponiblas en cò dei partenaris institucionaus.
Pasmens, sota la pression d'actors culturaus locaus, e maudespiech de sa maufisença promiera, la direccion de MP13 assaja encuei d'entamenar un començament de consultacion mai virat devèrs leis especificitats dau terrador marselhés.
Lo sit de l'organizacion se permete d'aculhir lo visitaire amb una fraseta en occitan, la dicha fraseta fasent resson a la manca de clartat dau projècte generau e sa manca de repercussion reala sus la populacion locala e sa vida vidanta, franc de veire augmentar a pauc près totei lei taxas localas d'amenatjament e lo cost de l'imobilier.
En fòra dei questions lingüisticas que venon coma sempre pertocar lo terraire provençau, lo país marselhés a despuei d'annadas una cèrta vitalitat dins lo domèni de la creacion artistica en lenga occitana. Reviscolat per Massilia Sound System que venguèt perseguir una lònga tradicion de cantaires populars de carriera, aqueu moviment se desplega encara ambé l'existéncia d'un grope màger coma lo Còr de la Plana, que ven recentament de far una virada ais Estats-Units d'America e de far la dubertura de Zebda a l'Olympia de París.
Au començament, l'organizacion de MP13 laissèt de caire tot aquel aspècte de la creacion artistica marselhesa, preferissent privilegiar una cultura mai mass market e mondializada.
Lo revirament actuau de l'organizacion laissa pensar qu'aquí tanben, una dubertura a la creacion en occitan es prevista.
Pasmens, aqueu "netutge" entamenat amb Euroméditerranée, que lei cataus locaus eisitan pas de ramentar la finalitat - forabandir lei classas popularas dau còr de vila marselhés per faire venir una nòva populacion bankable e possiblament concernida per lei festivitats que menarà MP13 – pausa una question que va en delai de l'estricta problematica de la visibilitat ponctuala de la cultura nòstra.
La lenga occitana deu-ti r'èstre qu'un objècte de cultura, que lei gents venon consomar, coma anarián consomar quauqua world music que siegue, ò devem-ti bèu promier aparar, a mai de la lenga, leis especifitats que fan de Marselha un espaci en fòra deis autrei grandei ciutats francesas a qu'a permés, fins ara, de mantenir un cèrt particularisme locau que leis institucions vorrián bessai plastificar e museificar?
Aquela question demòra duberta. Nautres, coma associacion culturala dau país marselhés fagueriam tre lo començament la causida de li pas participar, en in coma en off. Vos laissi en debàs, amai dau sit oficiau de l'organizacion, un sit especialement mes en linha per li porgir la contrèsta.
Fai avans!
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Adiu,
La Capitala Europenca de la Cultura es bailejada per la CCI, valent a dire per lo MEDEF locau. Ieu tròbi naturau de li préner sei dardenas, que tre la debuta son nòstras, e de leis emmerdar en prepausant nòstre biais falabraca e calorós de conçaupre la cultura.
A-n-elei, son biais es comerciau e basta ! En consequéncia, sa vision de l'art e deis artistas es pretextuala e sa tòca vertadierament es la de la rentabilitat. Siáu vengut a l'ostau per faire mostrar au conseu d'administrança que bastava de captar sei dardenas, e de se'n sarvir coma voliam, per cambiar la vision e la tòca.
L'esperit completament diferent, segon leis artistas, dei projèctes d'aquela annada 2013, es ara la pròva qu'era possible.
Siáu puei fòrça content de constatar que leis artistas que si fan lo mai "anti-2013", acepton sensa tròp de dificultat aquelei dardenas per peseguir sei projèctes personaus, a Kosice, a Matera tant coma a la Ciotat...leis empacharà pas de dire que Lo Còr de la Plana siam de mòrt-de-fam d'aguer cantat per 2013 a Marselha, dins nòsta vila, ambé nòstei dardenas.
E de ti far la predicacion, e de ti dire de traïdor, de vendut vò de crompat...En esperant, se'n van faire de concèrts vò de viatges d'estúdis fòra sa vila ambé lei memei dardenas, pagats per la mema estructura que denonçavon quand eron pas elei que si prenián leu sòus...
Ambé MP2013 leis artistas marselhés an coma lei borgés dau segle XIX ambé lei bordeus : en public se li escupisse dessuta, subre tot quora se li passa lo la nuech a porquejar...
Mai bota, s'aquelei sòus son dau MEDEF, li fau pas tocar, que nosautres siam nets e purs, blancs coma d'agnèus, que lo poder e sei dardenas son vertaderament caitius. Posquèri verificar a-n-aquèla escasença que l'ostau es tamben un luech d'exercíci dau poder, e d'un poder que ti parla pas mai en fàcia que lo poder que denóncia...
E tant que demorarà falabraca e calorós li tornarai ambé plaser !
potons
Seriá domatgi d'esquichar lei originalitats dau país. Dins aquesto cas, se lo monde ven a Marselha 2013 per veire ce que poiriá veire enluèc, vèu pas tròup a que serve. l'a que d'alumar la tv, per veire la cultura...
que dins lei doi cas, la cultura populara se vei jamai
Lei sits en question :
l'oficiau : www.mp2013.com
Lo "contrestaire" : www.marseille-en-guerre.com
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari