Lo Pimflòid

Introduccion:
 
Pensada Critica, qu’es aquò?
 
E t’ès dejà demandat si los crop circles èran hèits per socopas volantas qui vienen de l’espaci, per èsters de pura energia qui vienen de la nosta tèrra mes qui evolueishen sus autes plans vibratòris o per artistas umans qui vienen de la nosta Tèrra e deu noste plan vibratòri? T’ès dejà pausat la question de saber si valè miélher parlar de las toas dolors articulàrias a un kiné, un osteopata, un chaman o un medecin generalista… O béver un vèire de la toa pisha? E per las dolors deu còr e de l’esperit, as dejà esitat entre consultar un medium, ua psicanalista o ua psiquiatra, ua psicològa?
 
Jo, òc[1].
 
As trobat responsas simplas?
 
Jo, non. Mes responsas complèxas e mei o mensh provisòrias, be n’i a a aquestas questions e a hèra d’autas, ligadas au paranormau, a las credenças e a las “medecinas alternativas” qui i son sovent restacadas. Estudiar scientificament los fenomèns paranormaus, analisar scientificament las prentecions de las medecinas alternativas, pensar en dehòra de las credenças dogmaticas e deus arguments d’autoritat en apréner a utlisar lo noste esperit critic: que son quauques uns deus buts deu moviment sceptic contemporanèu.
 
Cada dimars a 16h sus Radiò País, que’vs inviti a ua etapa dens un gran viatge tà descobrir lo monde meravilhós deu scepticisme.
 
L’emission Pensada Critica qu’a començat en seteme de 2020 e qu’ei un abecedari deu scepticisme scientific (tanben aperat zetetica dens los país francofòns).
 
En parallèl de l’emission arre-escotabla suu soundcloud de Radiò País e deus bilhets ligats a cada numerò e disponibles sus la paja facebook de l’emission, aqueste blòg que’s vòu ua cronica dab drin mei de recul suus episòdis de la seria: que serà donc un abecedari tanben.
 
L’emission que’s compausa d’un plat de resisténcia - un subjècte qui tracti sol en me documentar o qui tracti dab ua auta persona qui’u coneish mei que jo - e d’un dessèrt: après ua pausa musicala, que parli bracament de tres autes subjèctes qui’m semblan interessants tanben e qui comentçan per la medisha letra… enfin si demora temps: qu’avem conviengut que l’emission devè durar entre 30 e 45 minutas.
 
Ací lo ligam tà escotar l’emission https://soundcloud.com/radio-pais/sets/pensada-critica?fbclid=IwAR3SaJkZdWkcwbooI0YsCxmpzPvBrwp3qj_TxellteXAO5WQVvzXjvYQHGw