Sam Karpienia

Sam Karpienia es cantador occitan desempuei 1998. Amb Gacha empega, avián endralhat lo repertòri tradicionau provençau dins un biais polifonic, un trabalh qu’a l’ora d’ara Manu Théron lo contunha amb Lo Còr de la Plana.
 
En 2000 participèt a l’enregistrament de L’Usina, l’album dau grop Dupain qu’amassa de tèxtes de trobadors marselhés dau sègle XIX a prepaus deis encanhaments de la classa obriera còntra lo capitalisme naissent. Aqueu trabalh fuguèt bastit amb l’ajuda de Glaudi Barsotti, personatge tras qu’important dins lo mitan occitanista marselhés.
 
Karpienia a contunhat d’enregistrar amb Dupain. Lo darrièr trabalh que publiquèron es Sorga en 2016.
 
Tanben trabalhèt amb lo Trio Forabandit, compausat per un musician d’Istambol, un iranian e un de Forcauquier. Aquí creèron un liame musicau entre doas ciutats maritimas: Marselha e Istambol.
 
A l’ora d’ara, Sam Karpienia trabalha sus lo pòrt de Marselha coma marin per una companhiá maritima, mai sèrva totjorn la flama per cantar e musiquejar. Per tant, dins aquesta tribuna de Jornalet, Karpienia publicarà quauquei pichons tròç musicaus, una mena de carta postala a prepaus de çò que lo turta, l’enaura, li fa gaug dins sa vida vidanta.
 
Bòna escota!