Lo mèrle (Turdus merula) es un passerat de talha mejana e plan corrent. Mesura entre 25 e 27 cm de long, fa 35-40 cm d’envergadura per un pes d’un centenat de grams. Es un dels ausèls mai corrents de l’estat francés amb un desenat de milions de cobles: viu pertot ont i a d’arbres, dins los òrts e dins los bòsques.
 
Lo mascle es un polit ausèl tot negre levat lo torn de l’uèlh e lo bèc que son jaune irange. La feme, ela, es mai bruna e d’una color mens uniforma, son bèc es brun. Lo jove sembla a la feme mas es mai clar.
 
Lo mèrle es un manjaire d’insèctes, mas subretot de vèrms pendent la prima. En ivèrn e a la tardor, manja fòrça baias e frutas, coma las pomas (sovent poiridas e oblidadas). Caça los vèrms dins l’èrba (subretot quand es corta) en sautejant e en los capturant amb son bèc quand ne vei un; manja subretot los insèctes dins las fuèlhas mòrtas: las revira d’un còp de bèc per trobar las aranhas e autres insèctes que s’amagan aquí dedins . En ivèrn s’apròcha de las manjadoiras per manjar granas pichonas, mas subretot vièlhas pomas se n’i a.
 
Lo mèrle commença de nisar fòrça d’ora, çò que li permet de far entre 2 e 4 nisadas. A cada còp pond de 3 a 5 uòus que la feme coa pendent 2 setmanas. Un còp nascuts, los joves son noirits de vèrms e d’autres insèctes. Sòrton del nis al cap de 12-14 jorns, mas los parents contunharàn de los noirir pendent 3 setmanas. Los pichons son independents al cap d’un mes fòra del nis.



 

---

Vesitatz lo blòg Auselum.