CAPÇALERA: publicitat jornalet
CAPÇALERA2: FAI-TE SOCI

Jornalet, gaseta occitana d'informacions

Diluns, 16 de setembre

Sèrgi Viaule

Dimenge, 26.10.2014 03h00

Rugbi femenin: entre amatorisme e professionalisme


Comentaris 2 comentaris    
Dolent Fluix Bo Molt bo Fabulós (7 vòtes)
carregant En cargament


Es pas per me conflar, mas soi amic amb Safi N’Diaye. Nimai es pas per me far lusir mai que de rasonable, mas soi estat collèga de trabalh de la Safi. Amb sa permission l’apelavi Safi Diaè que son nom d’ostal es una mica malaisit de prononciar per ieu. D’efièch, capiti pas aisidament de prononciar aquestas doas consonantas de seguida. Probablament que mon sistèma labial occitan es pas pro acostumat a n’aquel exercici de fonetica. Qual sap çò que ne pensan los lingüistas?
 
Safi N’Diaye la coneguèri a l’epòca, pas plan luèndana, ont demorava a Castras. Jogava alara al Castras Rugbi Femenin. Dins l’encastre de sa formacion professionala venguèt far un estagi long dins l’institut medicoeducatiu dins lo qual ganhavi mas trempas. Ai encara dins mos archius lo calendièr 2010 que me vendèt per dire d’emplenar una mica lo marrogal de son club. Lo sèrvi preciosament qu’es una pèça rara, anavi escriure una pèrla rara. Es enfachinant, cargat d’emocion, d’umor e d’erotisme. Cada jogaira pausa davant l’objectiu a pro pena estropada de linjariás finas. Aquestas prestada per un magasin de la vila. Èra l’epòca ont lo rugbi femenin èra encara tras qu’amator.
 
Totes los mediàs son d’acòrdi per dire que Safi N’Diaye es una jove femna simpatica, gaujosa e trabalhadora. Emai an rason! Safi es seriosa dins totas las entrepresas qu’entemena. A de carisme e va a cima de sas passions. Ne pòdi testimoniar.
 
Me maini que benlèu totes los legeires de Jornalet.com coneisson pas Safi N’Diaye. Alavetz, per los qu’an pas seguir lo mondial femenin d’ongan (se debanèt al mes d’agost), lor cal saber que Safi N’Diaye es una estela occitana del rugbi femenin. Foguèt una de las tres prepausadas per recebre lo titol de melhora jogaira del Monde. Finalament foguèt pas ela que foguèt designada. Rai! los mèdias internacionals parlèron benlèu mai d’ela que non pas de Magali Harvey, la canadiana que foguèt retenguda. Lo jornal esportiu francés L’Équipe consacrèt una pagina sancèra dins son edicion del 24 de setembre de 2014 a Safi N’Diaye. Es venguda un fenomèn mediatic.
 
Foguèri estrambordat quand aprenguèri que França Television aviá aquesit los dreches de difusion de la copa del monde femenina de rugbi. Aquò me permetèt de seguir los espets esportius de ma vedeta preferida. Devi dire que, coma totes los afogats de rugbi femenin, soi pas estat decebut per las perfomàncias de la Safi. Ça que la, me permeti de dire, en passant, qu’a d’unes moments me semblèt que mancava de nhaca. Subretot per l’ultima partida jogada (e perduda) contra Canadà. Amb sos mejans fisics exepcional (1,83 m per 93 k) me sembla qu’auriá pogut anar mai sovent a cima de sas traucadas dins las linhas de defensa advèrsas. Benlèu que nòstra tresena linha manquèt qualques còps de vista e de saba. Sus d’unas accions auriá tanben benlèu pogut èsser pus rapida. Mas bon! Èri pas ieu sus la pelena. Podem far fisança a la dobla campiona de França per progressar encara. Jòga ara al Montpelhièr Erau Rugbi, club campion de França en 2013 e 2014.
 
Se vos parli d’uèi de Safi N’Diaye es per çò legiguèri fa pas gaire dins un quotidian occitan de lenga francesa que veniá d’èsser estada elegida al Comitat director de Provale qu’es —coma cadun sap— lo sindicat dels jogaires professionals de rugbi a XV. Aprèp la darrièra Amassada Generala d’aqueste sindicat, son Comitat director novèl compta doas femnas. En mai de Safi N’Diaye es estada elegida Gaëlle Minhòt, la peiregordina talonaira del Montpelhièr Eraut Rugbi e capitana de l’esquipa de França. Lo president novèl del sindicat es Robins Tchale-Watchou, lo segonda linha de… Montpelhièr el tanben. Siá dich en passant coneguèri Robins, un òme fòrça simpatic el tanben, quand jogava a Galhac al moment que l’U.A.G. faguèt son unica sason en Pro D2.
 
Aquela informacion es pas anodina. Sulcòp me sautèt a la comprenèla. D’un costat soi fièr de véser que lo sindicat se siá femenisat. D’efièch, de dotze sòcis que compte lo Comitat director novèl, dos son d’ara enlà de femnas. Aquò’s una bona debuta e deu correspondre, a la gròssa, a la proporcion del nombre de licenciats dins lo rugbi… professional. E lo iat es plan aquí. D’un costat lo rugbi femenin se proclama amator e d’un autre latz doas femnas dintran al Comitat director del sindicat dels jogaires professionals de rugbi. I a quicòm que truca sus la planeta ovala!
 
Dins son entrevista balhada al jornal L’Équipe, Safi N’Diaye afortís que pren quinze setmanas per an de congièts sens paga per conciliar espòrt de naut nivèl e trabalh. Emai se se sap que lo Montpelhièr Erau Rugbi es probablament lo club femenin de rugbi lo mai amonedat d’Exagònia es pasmens totjorn considerat per las instàncias del rugbi coma un club amator. Caldriá que las autoritats del rugbi exagonal (Federacion, Liga e Provale) clarifican la situacion. Vesi mal los estatuts del Sindicat dels Jogaires professionals de rugbi preveire al dintre de son Comitat director l’eleccion de jogaires amators, foguèssen de jogairas amatoras.
 
S’agacham la convencion collectiva dels jogaire professionals de rugbi, aquesta pòrta clarament dins son article primièr que “La presenta convencion, conclusa en vertut dels articles L 2221-1 e seguents del Còdi del trabalh, concernís pas que lo sol rugbi professional que son organisacion e sa gestion son assegudas per la Liga Nacionala de Rugbi”. Cadriá saber!
 
Semblariá qu’ara per ara un cèrt nombre de clubs de rugbi femenin navigue, totes fòcs atudats, entre amatorisme e professionalisme.



publicitat
BANER1-2-3: DGPL DICTADES



Comentaris

30 d'octòbre 10.26h

Ten, la sabia pas occitana, la Safi N'Diaye. Seguei l'aventura de l'equipa França au mondiau e l'avia reperada. Mas efectivament, qu'es estonant de veire un sindicat de jugaires professionaus aculhir daus amators.


Valora aquest comentari:   votar positiu 1   votar negatiu 0
Respondre comentari replica Comentari inadequat   Formulari d'abús de comentari

26 d'octòbre 18.15h

Car es son jorn, agrada al Senhor que los dius, lo dimeshe, siòsquen mens conflats coma mens lusents.
Mercés per el. E visca lo rugbi femeni !


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER2: 468x60 Aran TV

Perfil

Sèrgi Viaule

Sèrgi Viaule logo rss

Poeta e prosator, e mai se se definís mai coma legeire que coma escrivan. Foguèt director de la revista 'Occitània' pendent 30 ans. Es ara collaborator de Lo Lugarn, la revista del Partit de la Nacion Occitana (PNO).

mai d'informacions

contactar l'autor

Mai d'articles

Archius




D'autres articles


Jornalet, gaseta occitana d'informacions