CAPCALERA: la botiga

Jornalet, gaseta occitana d'informacions

Dimècres, 21 d'abril

Jean-Charles Valadier

Dimècres, 11.11.2020 03h00

Non se fisar de París per faire circular de trens en Auvèrnhe e Lemosin


Comentaris 5 comentaris    
Dolent Fluix Bo Molt bo Fabulós (9 vòtes)
carregant En cargament





L’estat francès se lancèt dins una politica de linha LGV de fòrça granda velocitat a mai de 270 km/h per religar Paris a las autras metropòlis, e mai se aquel tipe de auta tecnologia non permèt d’i faire circular trens regionals e fret. Cal notar que la majoritat de las linhas de granda velocitat europèas son de tecnologia a 220 km/h plan mens cara e que permeton la circulacion de trens regionals e de fret. Atal, las LGV a la francesa son gravament deficitàrias e l’estat francés deguèt abandonar lo manteniment d’una granda part de la ret ferroviària dins los territòris de montanhas e de sèrras, çò que penaliza fòrtament Occitània.
 
Per compensar lo desengatjament de la SNCF, las regions Occitània Pirenèus Mediterranèa, Nòva Aquitània e Auvèrnhe Ròse Alps investiguèron fòrça dins lo ferroviari, qui sià dins la renovacion de las vias o la compra de material rotlant . Mas en despièit d’aquò, la SNCF i fa circular qu’un nombre minime de trens, malgrat los finançaments propausats per las regions. De son costat, Provença Alps Còsta d’Azur a una politica liberala e preferís obrir los trens a la concurréncia privada despuèi decembre de 2019.
 
Per relançar l’us del tren dins las zònas ruralas o de sèrras d’Occitània e preparar una societat mai ecologica, las regions pòdon demandar a l’estat francés lo transferiment d’infrastructuras (linhas capillaras fret o viatjaires, platas-formas de fret, garas de viatjaires) per tal de las revitalizar. Las regions pòdon alara crear de regia regionala de transpòrts e fisar l’explotacion de las linhas a un o mantes operators coma la SNCF o d’autres operators europèus privats o non. Pòdon tanben participar al capital de societats cooperativas d’interès collectiu, reünissent de collectivitats localas e de ciutadans ribairencs.
 
Aital, en 2019, d’occitans creèron la societat cooperativa de transpòrt ferroviari Railcoop, que lo sètge social n’es a Cambas en Carcin. Railcoop a per objectiu de lançar de trens subre de relacions abandonadas per la SNCF.
 
Dins un contèxt d’obertura totala a la concurréncia del mercat del transpòrt ferroviari a partir de decembre de 2020, Railcoop se donèt per ambicion d’enfortir l’us del ferroviari sus totes los territòris e contribuir a la transicion ecologica.
 
A l’estatut de societat cooperativa d’interès collectiu (SCIC) jos forma de societat anonima (SA) a capital variable. La cooperativa non es pas encara abilitada a far rotlar de trens. Sas demandas de licéncia e de certificat de seguretat son en cors.
 
Ambiciona Railcoop de far circular de trens de merças a la mièja de 2022 entre las zònas industrialas de Fijac e Tolosa. Son primièr grand projècte es lo restabliment d’una connexion ferroviària dirècta entre Bordèu e Lion, una connexion abandonada per la SNCF en 2014.
 
Una ligason Lion-Bordèu via Clarmont-Ferrand, Orlhac e Briva la Galharda permetriá de crear una transversala occitana est-oèst pel Massís Central auvernhat e limosin. Per de rason financièra Railcoop causiguèt de passar per Clarmont-Ferrand e non per Sant Estève e Lo Puèi de Velai, e mai se Railcoop sap que las connexions TER en Auvèrnhe son pro calamitosas.
 
La via ferroviària per Ussel es uèi impossible dempuèi lo barrament per la SNCF de la seccion entre La Cuelha de Perpesac e Ussèl. D’òbras son necessàrias. Dins l’espèra de recebre los finançaments, Railcoop vòl començar per l’itinerari que passa per Limòtges e Garait, mai al nòrd que l’itinerari istoric. Notifiquèt l’Autoritat de Regulacion dels Transpòrts (ART) en junh de 2020 per 3 circulacions quotidianas Lion-Bordèu a partir de mièg de 2022, amb una de nuèit. 9 garas intermediàrias en Arpitània, Auvernha e limosin serián desservidas.
 
En agost de 2020, Railcoop avià 1700 societaris e son capital èra ja de 500 000 èuros. Caldriá 1,5 milion d’èuros en fin d’annada per finançar l’obtencion de la licéncia d’explotacion sus la ret ferrada francesa, e un total de 5 milions per concretizar la primièra relacion viatjaires Lion-Bordèu. Tre 50 000 èuros Railcoop pòt tractar del fret sens depassar 50 milions de tonas/km. Cal 200 000 èuros fins a 200 milions de tonas/km e 500 000 èuros al delà.
 
Atal, institucions, ciutadanas e ciutadans occitans poiràn tornar lançar los trens en Occitània, en particular en Auvèrnhe e Limosin, participar a la transicion ecologica d’Occitània e botar d’anoncias en occitan, en oblidant Paris e sa SNCF centralizatritz.
 
 
 
 
abonar los amics de Jornalet
 
 


 



publicitat
BANNER1: IEO Arièja



Comentaris

12 de novembre 18.53h

Una remarca: qu'era possible de 'nar de Limòtges a Lion (mai de Bordeu a Lion en passar per Limòtges) l'i a enguera una diesena d'annadas, afen, qu'era la linha istorica per me Bordeu-Limòtges-Lion, vese pas çò que Briva ven far dins quel afar, an desjà l'autorota dau president A89 e puei, merda, Limòtges, qu'es totparier la tresesma vila dau grand sud-oest après Tolosa e Bordeu, ignorar Limòtges, qu'es pas possible, qu'es penible a fòrça!!!


Valora aquest comentari:   votar positiu 4   votar negatiu 0
Respondre comentari replica Comentari inadequat   Formulari d'abús de comentari

11 de novembre 17.12h

perqué Auvèrnhe ??? quand se dis Auvernha ?


Valora aquest comentari:   votar positiu 5   votar negatiu 1
Respondre comentari replica Comentari inadequat   Formulari d'abús de comentari

11 de novembre 10.44h

Aquela novela m'agrada. Una pensada per la linha Limotges-Tlosa. I a pus moien de cerchar un oraire de tren per anar de Limotges a Tolosa sens que nos fassan passar per Bordeu e mesme i a un car que pòd vos menar de Limotges a Tolosa.
Quand lo chamin de far menava la vita dins las contradas dau Massif-Centrau!


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

11 de novembre 09.38h

lo projècte es estonant e un chic excitant tanben !
quand se pensa a totas las linhas que son estadas barradas dempuish 1960, e a las solucions qu'aqueras linhas poirén portar uèi-lo-dia ende redusir lo trafic automobile...


Valora aquest comentari:   votar positiu 6   votar negatiu 0
Respondre comentari replica Comentari inadequat   Formulari d'abús de comentari

11 de novembre 08.27h

Non se fisar de París per faire circular de trens en Auvèrnhe e Lemosin ? Non se fisar a París, en res ni per res…


Valora aquest comentari:   votar positiu 11   votar negatiu 0
Respondre comentari replica Comentari inadequat   Formulari d'abús de comentari

5 -10 -20 -tots
1




Comenta

Lo comentari es estat mandat corrèctament

  Previsualiza

La direccion del Jornalet a lo drech de publicar pas aqueles comentaris que respècten pas las nòrmas basicas d'educacion, civisme e dialòg.
publicitat
BANER3: Ràdio Occitània

Perfil

Jean-Charles Valadier

Jean-Charles Valadier logo rss

Adjunt al cònsol de Tolosa en carga de la lenga e cultura occitana de 2008 a 2014, es membre de la comission Regions e Federalisme del partit Euròpa Ecologia Los Verds.

mai d'informacions

contactar l'autor

Las mai...


Mai d'articles

Archius




D'autres articles


Jornalet, gaseta occitana d'informacions