Es un plat conegut en bona part d’Occitània, concretament dins las regions de Peiregòrd, Lemosin, Marcha, Auvèrnhe, Lengadòc e Bacin de Ròse. Se pòt far de fòrça manièras, segon l’endrech. I a pas ges d’unanimitat a l’ora de l’aprestar e las recèptas, sovent, an solament en comun que los ingredients principals son lo conilh e la mostarda. Es generalament un conilh onchat amb de mostarda e enfornat, mas, de còps, lo fan rostir a la caçòla, a fuòc de flama, sol o acompanhat de cebas, d’alhs o d’escaluènhas. Dins qualques cases, la mostarda se met a la fin, amb la caçòla fòra del fuòc, e ne garda aital tota la sabor. De totas las manièras, es un plat fòrça agradiu, bon per totes los paladars.
 
 
Conilh amb mostarda
 
Ingredients: 1 conilh d’1 kg e ¼ , 300 g de mostarda, vin blanc, pebre e sal.
 
Preparacion: d’en primièr decoparem lo conilh, lo salpicarem de sal e pebre, l’oncharem amb fòrça mostarda, lo metrem dins una caçòla (onchada amb de lard), i apondrem un veirat de vin e l’enfornarem, a 180º. O remenarem de quora en quora e, al cap d’aperaquí 30 minutas, o trairem, servirem lo conilh dins las siètas e la salsa que nos serà demorada dins una salsièra e o menarem a taula.
 
 
Variantas regionalas
 
Auvèrnhe: d’unes rostisson lo conilh a la caçòla (en companhiá d’una ceba e un parelh d’escaluènhas, tot chaplat) e, en acabant, sacan la caçòla del fuòc e alavetz i apondon la mostarda e un rajòl de crèma; en aquela varianta, puèi que la mostarda coi pas al fuòc, ne garda tota la sabor.
 
Lemosin: salpicarem lo conilh de sal e pebre, l’oncharem amb mostarda e lo metrem dins una caçòla (onchada abans amb de lard). I apondrem qualques escaluènhas, qualques rametas de jolverd (tot chaplat e dos veirats de vin blanc e o enfornarem. D’unes i apondon un rajòl de crèma.
 
Lengadòc: podèm perfumar lo conilh, abans de l’enfornar, amb qualques brins de ferigola, de cerfuèlh o de sàlvia. Podèm cambiar lo lard contra grais d’auca o contra d’òli (d’unes asagan lo conilh amb d’òli). D’unes i meton dins la caçòla de granas d’alh peladas. I podèm ajustar a la salsa mièg veirat de crèma. Per qualques endreches lo fan a l’ast, entièr, onchat amb mostarda e recobèrt amb de lescas de carnsalada. Per d’autres endreches lo rostisson dins la caçòla, a fuòc de flama e, a la fin, lo trason, i apondon un veirat de vin blanc (o bolhon de galina), o fan bolhir qualques minutas e, amb aquela salsa, l’asagan.
 
Marca: d’unes enfornan lo conilh tot entièr, simplament onchat de mostarda o recobèrt de lescas de carnsalada. Podèm apondre a la salsa mièg veirat de crèma.
 
Peiregòrd: saurengarem lo conilh amb de grais d’auca (en companhiá de tres o quatre granas d’alh e un parelh d’escaluènhas, tot chaplat), i apondrem un veirat de bolhon d’ola e una botelha de vin blanc, o daissarem bolhir un brieu, atudarem lo fuòc, tirarem lo conilh de la caçòla, i apondrem la mostarda e bolegarem; d’unes i saurengan un culhierat de farina. I podèm apondre una rameta de ferigola o un parelh de fuèlhas de laurièr. En aquela varianta la mostarda, puèi que la mostarda còi pas al fuòc, ne garda tota la sabor.
 
Ròse: getarem un rajòl d’òli dins una caçòla e saurengarem de grans d’alhs, una ceba capolada, qualques escaluènhas chapladas, de fuèlhas d’api, una rameta de ferigola, una autra de romanin e una fuèlha de laurièr e, quand aquò se serà daurat un pauc, o trairem tot de la coquèla e i metrem lo conilh, salipicat de pebre e sal e onchat amb la mostarda. Lo remenarem de quora en quora amb lo culhièr de fusta e, quand serà plan rostit, lo tirarem del fuòc e lo metrem sus las siètas. Metrem fin finala dins la caçòla un culhierat gròs de bolhon d’ola, o daissarem bolhir qualques minutas, o tirarem del fuòc e o vojarem dins una salsièra. O menarem puèi a taula, lo conilh e la salsièra.
 
D’autres i saurengan lo conilh, lo fan bolhir amb un pauc de vin blanc e una rameta de ferigola e, cap a la fin de la coseson, i apondon la mostarda.
 
D’autres encara lo fan al forn, entièr, onchat de mostarda e recobèrt amb de de lescas de carnsalada.
 
 
Autras denominacions: lapin amb mostarda.