Avertiment: aqueste article que parla deus episòdis 19, 26 e 28 de Pensada Critica. Qu’ei drin long, n’èi pas sabut sintetisar las meas ideas aqueste còp. Si n’i a qui vòlen escotar l’emission meilèu que de léger l’article, que’s pòt har ací ,   Radio Pais · Pensada critica : C com cataristas   ací   Radio Pais · Pensaca critica, sason dusau : A com Antroposofia   e ací.   Radio Pais · Pensada Critica : S com Steiner( e los catars) dab Grégoire Perra.   Que tròbi l’article interessant totun, mercés a las personas qui legeràn e escotaràn.

 
 
E coneishetz l’antroposofia? La societat antroposofica qu’estó fondada en 1913 per l’ocultista austrian Rudolf Steiner. Lo son sièti sociau qu’ei lo Goetheanum, un gran bastiment près de Dornach, en Suissa.
 
Si wikipedia la defineish com “un corrent esoteric e filosofic”, la Miviludes e l’Unadfi que la qualifican de “moviment filosophico-religiós” qui presenta un risc de deriva sectària.
 
Qu’a ligams mei o mensh oficiaus dab hèra de sectors economics e politics: los cosmetics dab la marca plan coneishuda Weleda (e tanben dr Hauschka), l’economia solidària dab la Nef, l’educacion dab las escòlas Steiner-Waldorff e la pseudò-medecina dab la “medecina antroposofica”, etc.
 
Qu’a tanben ligams dab hèra de personalitats mediaticas: Pierre Rabhi, Cyril Dion, Françoise Nyssen, etc.
 
En escotar parlar Grégoire Perra, principau “lançaire d’alèrta” francés suu subjècte e ancian capulat d’aqueth moviment, qu’estoi susprés d’enténer que dens las escòlas Steiner que s’i recitava, a l’epòca on i èra elhève, pregàrias “cataras”.
 
Que’u contactèi donc tà’n saber mei e, hèra amistós e disponible, que m’expliquè quin Rudolf Steiner avè integrat la soa vision deu catarisme a la soa doctrina religiosa new-age.
 
Ua entrevista hòrt interessanta qui passè dens Pensada Critica.
 

 
Mes quauques dias après, que cadoi sus un document video de l’INA qui presentava Deodat Roché a l’encòp com ua personalitat importanta de la renavida de l’interés per l’istòria de las eresias dens lo Lengadòc… e com un adèpte de las teorias de R. Steiner.
 
Que’n voloi saber mei e que prepausèi a Grégoire Perra ua segonda entrevista mes eth que’m digó que ne’n sabè pas hèra sus Roché e que’m conselhè de m’adreçar meilèu au youtubaire Shadow Ombre.
 
Shadow Ombre qu’ei un òmi misteriós: estujat darrèr un pseudonim e efèits qui estujan lo son còs que publica sus youtube videos criticas a prepaus de las crendenças new age, qu’ei estat invitat per media sceptics per’mor de las soas coneishenças ponchudas sus l’istòria d’aqueras credenças mes eth medish que’s dessolidarisa de còps deu scepticisme e que’s revendica musulman.
 
Que charrèm ua òra e quart a prepaus de las originas e deu començar de l’antroposofia aus sègles XIX e XX, puish que’ns orientèm de cap a Deodat Roché.
 
Si descobritz Deodat Roché en léger aqueste article, qu’ei a eth qui devem enter autas causas l’estèla quilhada au pè deu Pog de Montsegur qui indica en occitan “als catars, als martirs del pur amor crestian”. Qu’escrívó mantuns libes suu subjèctes, qu’animè camps d’estiu e un musèu que li ei dedicat a Arcas dens Aude on viscó.
 
La question màger qui’m pausavi qu’èra de saber si la soa adesion a las tèsis ocultistas de Rudolf Steiner avèn influenciat la soa faiçon d’estudiar e de popularisar la figura deus catars.
 
E la responsa de Shadow qu’ei un “òc” shens nada ambiguitat e dab arguments sortits deus tèxtes publicats a l’epòca.
 
A la fin qu’evoquè l’eretatge de Deodat Roché, dab en particular l’autor e conferencièr José Dupré qui parla deus catars, de Roché e de Steiner dens las soas intervencions publicas.
 
Que’m demoran questions après aqueste entretien:
 
L’amistat entre Deodat Roché e Renat Nelli e l’influéncia de l’un sus l’aute a prepaus deus estudis catars empipautan tot çò qui an hèit l@s continuator(a)s de Renat Nelli d’un sopçon de non-scientificitat vist que reveravan aquestes “mèstes” o ben lo lor tribalh e’s pòt considerar com seriós[1]?
 
Quau ròtle jòga l’imatge positiu qui lo monde an deu catarisme dens lo “soft power” de la societat antroposofica uei o dens aqueth d’autes moviments neo-religiós e/o sectaris?
 
Dens las annadas 1940 e 1950 l’Institut d’Estudis Occitans qu’ajudè bon drin Roché a publicar los sons escriuts. Si podem compréner que i aja avut a l’epòca ua convergéncia d’interés entre l’ocultisme steinerian e ua branca de l’occitanisme a qui agradava l’idea d’aver martirs nacionaus qui podè mitificar, avem enquèra besonh de fantasmar los catars au sègle XXI?
 
Ne seré pas mei interessant e san de destriar mites new age d’ua coneishença scientifica tostemps en evolucion?
 
Mes s’ac volem har, quins utís se podem hargar entà’s reperar dens çò qui sembla un continuum, a prepaus de la question catara, qui partiré de la literatura scientifica pura tà arribar a la literatura ocultista pura en passant per hèra de tipes de mesclanhas entre sciéncia istorica e credenças neo-religiosas?
 
Si n’i a qui, com jo, an credut causas a prepaus deus catars e ne dobtan bitara o las tienen per faussas, que’vs prepausi de’n discutir dens los comentaris e de partatjar dobtes, questions e coneishenças.