Divendres, 10.3.2017 03h00
En junh de 2012, escriviá ma tresesma cronica dins Jornalet, e vos prepausava de segre quauques punts precís de la politica governamentala per çò de l’ecologia. François Hollande veniá d’èsser elegit e un acòrd era estat passat emb EE-LV qu’aviá agut lo drech a dos ministeris. A un mes de la novela eleccion presidenciala en França, quò es lo moment d’i tornar.
Lo prumier punt era l’expleitacion daus gas e òli d’eschiste. Emb l’interdiccion de la fracturacion idraulica, podem dire que los ecologistas an agut una victòria. Quò es lo sol metòde conegut auei per recuperar quilhs idrocarburs. E mai, a la fin dau mes de genier passat, daus deputats de mança an depausat una proposicion de lei interdisant lor expleitacion. Iniciativa tardiva e nonmàs simbolica perque chabet pas son parcors legislatiu davant la fin de la mandatura. Marca tanben una revirada: la de pas aver pogut modifiar lo còdi minier d’un biais ecologic. Las industrias de l’extraccion son totjorn a l’òbra e los projectes tan dangierós per l’environament. Pense per exemple a l’expleitacion de l’aur tan en Occitània (a Luçac, en Combralha) coma en Guaiana.
Lo segond punt concernís los transpòrts. Aquí, las chausidas daus diferents governs socialistas van pas dins lo sens d’un desvelopament ecologic: autorizacion de linhas de cars lonja distància, barradura de linhas de trin de nuech, relança autorotiera, sosten au projecte d’aeropòrt de Notre-Dame-des-Landes… Sem en plena contradiccion emb los objectius de lucha contra los chamjaments climatics.
Tresesme punt, lo nuclear. Escriguei ma cronica un mes après la sus l’accident de Fukushima, au Japon. Escriviá: “Hollande sembla pas voler respectar l’acòrd PS/EELV en barrar nonmàs la centrala alsaciana de Fàssene”. Cinc ans apres, quela centrala es quitament pas barrada. La sortida dau nuclear es totjorn pas d’actualitat. Nos faudrà un accident en França, per poder compréner?
Lo darrier punt parlava de la gestion de la sauvatgina. Los diferents ministres de l’environament son pas franchament estats dau costat de sa preservacion. Vos parlei dau lop en abriu 2013 episòdi:la chaça a l’aucha, qu’una directiva europea interditz a partir de la fin dau mes de genier, e que la ministra Ségolène Royal autoriza de fach, en demandar a son administracion de pas sanccionar los contravenents. D’efiech, la preservacion de la biodiversitat es pas estada una prioritat per François Hollande. L’economia prima, e las confrontacions son estadas mai que violentas coma los ecologistas. De segur, pense a la mòrt de Rémi Fraysse.
Qual avenir per de las politicas publicas ecologistas? Yannick Jadot chausiguet de se retirar per sostener lo socialista Benoît Hamon. D’autres se viran vers lo sociauliberau Macron o vers lo sociaurepublican Mélenchon. Emmanuel Macron me sembla clarament pas la bona opcion, perque son economisme passarà avant tota avançada ecologica. En veire lo quiquenat passat, podem dobtar de la sinceritat d’Hamon, o de sa capacitat a impausar de las chausidas ecologistas a son partit. Per çò de Mélenchon, lo fòrt encastre nacionau que vòu balhar a sa politica me sembla un fren a la resolucion de problemas que necessitan una vision transnacionala.
I a cinc ans, podiam pensar que l’ecologia avancariá. Es una de las perdantas dau quinquenat passat, e sembla pas que pesarà sus lo venent.
Comentaris
13 de març 10.50h
Bonjorn Guilhem,
Non, podem pas dire que n'i a 'gut una radicalizacion dau movement ecologista. Per exemple, la ZAD de Notre-Dame-des-Landes es estada occupada per de bon dempuei 2009 e lo Camp Accion Clima.
Podem tanben parlar daus dralhaires volontaris qu'eran actius pendent los ans 2000.
Cò qu'es nuòu, qu'era la determinacion politica contra quilhs movements. Sarkozy laisset far los ecologistas a Notre-Dame-des-Landes, mas Hollande decidet d'evacuar la zòna. La politica de Hollande es... Legir la seguida
Valora aquest comentari:
1
0
11 de març 13.11h
Olande devia far quauqua ren per las lengas regionalas, per l'ecologia e a ren far. Perqué? Perque es pas lo mestre; depend d'un poder qu'es au-dessus d'ilh, consenten o pas consenten..
Que partan los politics de dreichas o d'esqueras, quò me derangea pas. Desfachan la Franca. La Franca quò es pus mas un discors autoritari e centraliste. Trobaren totjorn un moien de far la Franca autrament pus redde que de separar la Franca dau nòrd d'aquela dau sud.
Valora aquest comentari:
1
2
11 de març 11.00h
#1 Seriosament, a l'i visar de près, l'i a 'gut 'na recuolada neta de la politica ecologica, l'i a mas veire la ministra actuala lol, vese donc pas coma podriam far confiança a l'accion politica en matèria ecologica, l'i a donc ren que de ben normau que la societat civila s'empare de la question en se rebufar. Fau saubre çò que volem, 'melhorar la situacion ecologica o abandonar ? mas dins queu segond cas, ne'n faudrá assumir las consequéncias, afen, m'es d'avís que quand n'auram lo nas... Legir la seguida
Valora aquest comentari:
2
0
10 de març 20.54h
Bonjorn,
Pausi la question sens rèire-pensadas : dins lo quinquenat i aguèt pas una "radicalisacion" (amb verguetas) d'una part del moviment ecologista ? Pensi per exemple a las manifestacions ecologistas qu'avèm conegudas, mai duras qu'abans (es un sentit, benlèu pas una realitat) - Nòstra dòna de las Lanas - Lo testet - Lo gaz d'eschisme - e autras Zad.
I auriá pas agut, de la part d'unes ecologistas, l'abandon de la cresença dins lo poder politic pendent aqueste quinquenat ?
Valora aquest comentari:
1
0
1
Comenta
Lo comentari es estat mandat corrèctament
4 comentaris
(3 vòtes)
En cargament
4 comentaris
Mandar
